اسكەري قىزمەتكەرلەر ورتتەن الماتىلىق تۇرعىندى قۇتقارىپ قالدى

الماتى قالاسىنداعى جوندەۋ بازاسىنىڭ اسكەري قىزمەتكەرلەرى – ابىلايحان وماروۆ پەن تالعات ءابجانوۆ 59 جاستاعى ەر ادامدى ورتتەن قۇتقارىپ قالدى دەپ حابارلادى turkystan.kz.

اسكەري قىزمەتكەرلەر وماروۆ پەن ءابجانوۆ اۋلاسىندا اۆتوكولىك جوندەپ جاتقان جەرىنەن كورشى كوشەدەگى ءتۇتىندى كورگەن.  كومەك سۇراپ ايقايلاعان داۋىستى ەستىگەن بەتتە ولار ءورت ورنىنا دەرەۋ جۇگىرىپ جەتكەن.

قالىڭ قارا ءتۇتىن جەكە ءۇيدىڭ اۋلاسىندا ورنالاسقان عيماراتتان شىعىپ جاتىر ەكەن. ابىلايحان مەن تالعات دۋالدان سەكىرىپ ءتۇسىپ، جانىپ جاتقان عيماراتتان ءبىر قارت ادامدى الىپ شىقتى. اسكەري قىزمەتشىلەر زارداپ شەگۋشىگە العاشقى كومەك كورسەتىپ، مەديتسينالىق جانە ءورت ءسوندىرۋ بريگادالارىن شاقىردى.

ءورت جاپسارلاس قۇرىلىستان تۇرعىن ۇيگە كوشۋى مۇمكىن دەپ قاۋىپتەنگەن ەفرەيتورلار وماروۆ پەن ءابجانوۆ ءورتتى سوندىرە باستادى. ولارعا تجد قىزمەتكەرلەرى كومەككە كەلدى.

زارداپ شەككەن ازامات ل.، 1963 جىلى تۋعان. ول ەكىنشى جانە ءبىرىنشى، ەكىنشى جانە ءۇشىنشى دارەجەلى كۇيىك الىپ، №4 قالالىق كلينيكالىق اۋرۋحاناعا جەتكىزىلدى.

«ءبىزدىڭ ورنىمىزدا كىم بولسا دا وسىلاي ىستەيتىن ەدى. مەديتسينالىق دايىندىق ساباقتارىندا ءبىزدى ءورت كەزىندە زارداپ شەككەندەرگە العاشقى كومەك كورسەتۋگە ۇيرەتەدى. بىراق ءبىز العان ءبىلىمىمىز ومىردە كادەگە جارايدى دەپ ەشقاشان ويلاماپپىز»، – دەيدى ءورت ءسوندىرۋشى دوستار سىپايىلىق تانىتىپ.

ءورت سوندىرۋدە جانە ادامدى قۇتقارۋ كەزىندە كورسەتكەن ەرلىگى ءۇشىن قورعانىس ءمينيسترى گەنەرال-پولكوۆنيك رۋسلان جاقسىلىقوۆتىڭ بۇيرىعىمەن اسكەري قىزمەتشىلەر «ەل قورعانى» ۆەدومستۆولىق مەدالىمەن ماراپاتتالدى.

ۇقساس جاڭالىقتار

Back to top button