180 كۇندىك شەكتەۋ اياقتالۋعا جاقىن – مينيستر گازدىڭ باعاسى تۋرالى ايتتى

ەنەرگەتيكا ءمينيسترى بولات اقشولاقوۆ سۇيىتىلعان گازدىڭ شەكتى باعاسىن ۇستاپ تۇرۋ ءتيىمدى ەمەس ەكەنىن مالىمدەدى دەپ حابارلادى turkystan.kz.

قاڭتار وقيعالارىنان كەيىن پرەزيدەنت گاز بەن جانار-جاعارمايدىڭ باعاسىنا شەكتى باعالار ەنگىزۋدى تاپسىرعان بولاتىن. 180 كۇندىك شەكتەۋ شاراسى 1 شىلدەدە اياقتالادى. ماسەلەن، زاۋىتتىڭ وزىنەن گازدىڭ ءبىر ءليترى 16 تەڭگەدەن ساتىلۋى شارت.

ءمينيستردىڭ ايتۋىنشا، بۇل – وتە تومەن باعا. سەبەبى زاۋىتتاردا جوندەۋ جۇمىستارىنا قىرۋار قارجى جۇمسالادى.

«وتە تومەن باعالار ساقتالا بەرسە، ءوندىرىستى كوبەيتۋگە ەشقانداي ىنتالاندىرۋ بولمايدى. ويتكەنى قازىرگى باعالار گازدى شىعارۋعا كەتەتىن شىعىننان دا تومەن بولىپ وتىر»، – دەدى اقشولاقوۆ ماجىلىستەگى ۇكىمەت ساعاتىندا.

ءمينيستردىڭ ايتۋىنشا، 180 كۇندىك شەكتەۋ اياقتالعاننان كەيىن گاز اينالىمى باقىلاۋعا الىنادى. وعان قوسا، زاڭناماعا قوسىمشا وزگەرىستەر ەنگىزىلەدى.

«ەنەرگەتيكا مينيسترلىگى مەملەكەتتىك كىرىستەر كوميتەتىمەن بىرلەسە وتىرىپ، ىشكى نارىقتا ساتىلاتىن سۇيىتىلعان گازدىڭ اينالىمىن قاداعالايدى. سونداي-اق، مينيسترلىك گاز جانە گازبەن قامتاماسىز ەتۋ تۋرالى زاڭعا وزگەرىستەردى ازىرلەپ قويدى. سوندا ەنەرگەتيكا مينيسترلىگىنىڭ سۇيىتىلعان گازدى بولشەك ساۋداداعى شەكتى باعالارىن بەكىتۋ قۇزىرەتى قاراستىرىلادى»، – دەدى مينيستر.

ۇقساس جاڭالىقتار

Back to top button