قازاقستاندىق ۋنيۆەرسيتەتتەر دەبات ءتۋرنيرى جەڭىمپازدارىنا گرانت بەرەدى

قازاقستاندىق ۋنيۆەرسيتەتتەر دەبات تۋرنيرلەرىنىڭ جەڭىمپازدارىنا گرانت بەرەدى دەپ حابارلادى turkystan.kz.

ءبىلىم جانە عىلىم مينيسترلىگىنىڭ ءباسپاسوز قىزمەتى حابارلاعانداي، دەبات تۋرنيرلەرىنىڭ جەڭىمپازدارى مەن جۇلدەگەرلەرى قوماقتى اقشالاي سىيلىقتار مەن ءبىلىم گرانتتارىن الادى. بيىل قازاقستاننىڭ 6 جوو 12 پىكىرسايىسشى تۇلەككە ءبىلىم گرانتىن بەردى. ولار قورقىت اتا اتىنداعى ۋنيۆەرسيتەتى، س. امانجولوۆ اتىنداعى شقۋ، ح. دوسمۇحامەتوۆ اتىنداعى اتىراۋ ۋنيۆەرسيتەتى، تۇران ۋنيۆەرسيتەتى، Satbayev University جانە نارحوز ۋنيۆەرسيتەتىندە وقۋعا گرانت الدى. سونداي-اق تۋرنيرلەرگە قاتىسقانى ءۇشىن جاستار گراموتالارمەن، كۋبوكتارمەن جانە 200 مىڭنان 500 مىڭ تەڭگەگە دەيىن اقشالاي سىيلىقتارمەن ماراپاتتالادى.

ءبىلىم جانە عىلىم مينيسترلىگى دەبات قوزعالىسىن كەڭىنەن ناسيحاتتاۋ بويىنشا بەلسەندى جۇمىس جۇرگىزىپ كەلەدى. بۇگىنگى تاڭدا ەلىمىزدە 120 944 ادامدى قامتيتىن 6 778 دەبات كلۋبى بار. ولاردىڭ اراسىندا وقۋشىلار دا، ستۋدەنتتەر دە بار.

«ەلىمىزدە وقۋشىلار مەن ستۋدەنتتەردىڭ دەبات قوزعالىسى بەلسەندى تۇردە دامىپ كەلەدى. ەكى جىل بۇرىن 4 405 مەكتەپ جانە ستۋدەنتتىك كلۋبتا 66 186 پىكىرسايىسشى بولسا، بۇگىندە ولاردىڭ سانى 120 مىڭنان استى. ولار سىندارلى تالقىلاۋ ونەرىن ۇيرەنەدى، باسقا دەباتشىلارمەن دوستىق جانە سىيلاستىق قارىم-قاتىناس ورناتادى، سونداي-اق ولار وي-ءورىسىن كەڭەيتىپ، شىعارماشىلىق بەلسەندىلىكتەرىن ارتتىرادى. بيىل بالالار جىلى اياسىندا بەس دەبات ءتۋرنيرى ۇيىمداستىرىلادى. بۇگىنگى كۇنى ونىڭ ەكەۋى وتكىزىلدى. ولارعا 500-گە جۋىق وقۋشى مەن ستۋدەنت قاتىسىپ، كامەلەتكە تولماعانداردى وقىتۋ، تاربيەلەۋ جانە ولاردىڭ قۇقىقتارىن قورعاۋدىڭ ماڭىزدى ماسەلەلەرىن كوتەرەدى. پىكىرسايىس قوزعالىسىن دامىتۋ ماقساتىندا ءبىلىم جانە عىلىم مينيسترلىگى دەبات قوزعالىسىنىڭ جوبالىق كەڭسەسىن قۇردى. بۇل قوزعالىستى كەڭىنەن ناسيحاتتاۋ ماقساتىندا الەۋمەتتىك جەلىلەردە اقپاراتتىق-ءتۇسىندىرۋ جۇمىستارى بەلسەندى جۇرگىزىلىپ جاتىر. جاڭا مەكتەپىشىلىك دەبات كلۋبتارى قۇرىلىپ، وبلىستىق جانە اۋداندىق دەڭگەيدە ۇيلەستىرۋشىلەر انىقتالدى، ءتۇرلى كەزدەسۋلەر، دوڭگەلەك ۇستەلدەر، ۆەبينارلار وتكىزىلىپ جاتىر»، – دەدى بعم رەسپۋبليكالىق قوسىمشا ءبىلىم بەرۋ وقۋ-ادىستەمەلىك ورتالىعىنىڭ ديرەكتورى رايسا شەر.

ەلىمىزدە وقۋشىلاردى دەبات ونەرىنە باۋليتىن 100-دەن استام ماماننان تۇراتىن تاجىريبەلى پىكىرسايىسشىلار پۋلى قۇرىلدى. سونىمەن قاتار كوللەدجدەر مەن مەكتەپتەردە دەبات كلۋبتارىنا كومەكتەسۋ ءۇشىن ستۋدەنت دەسانتشىلار قۇرىلىپ جاتىر. پەداگوگيكالىق جوعارى وقۋ ورنىنىڭ بارلىعى ەرىكتىلەر توپتارىن قۇرىپ، مەكتەپتەردە ترەنينگتەر مەن شەبەرلىك ساباقتارىن وتكىزەدى، تۋرنيرلەردى ۇيىمداستىرۋ كەزىندە ۆولونتەرلىك كومەك كورسەتەدى.

ودان بولەك، بيىل رەسپۋبليكالىق وقۋ-ادىستەمەلىك ورتالىعى دەبات كلۋبتارىنىڭ جەتەكشىلەرىنە كومەك كورسەتۋ ماقساتىندا پىكىرسايىس ماشىقتارىن دامىتۋ تاقىرىپتارىندا 35 ۆەبينار وتكىزدى. ولارعا 3 مىڭنان استام ادام قاتىستى.

 

ۇقساس جاڭالىقتار

Back to top button