شەتەلدەگى داۋىس بەرۋ ۋچاسكەلەرى ءوز جۇمىسىن باستادى

جاپونيا مەن كورەيا رەسپۋبليكاسىندا تۇراتىن قازاقستان رەسپۋبليكاسىنىڭ ازاماتتارى ەلىمىزدىڭ كونستيتۋتسياسىنا وزگەرىستەر مەن تولىقتىرۋلار ەنگىزۋ جونىندەگى جالپىۇلتتىق رەفەرەندۋمدا وزدەرىنىڭ داۋىس بەرۋ كونستيتۋتسيالىق قۇقىعىن العاشقىلاردىڭ ءبىرى بولىپ پايدالاندى دەپ حابارلادى turkystan.kz baq.kz سايتىنا سىلتەمە جاساپ.

رەفەرەندۋمدا داۋىس بەرگەن العاشقى قازاقستاندىق توكيو قالاسىندا جاقىندا 18 جاسقا تولعان جاس سايلاۋشى اليجان ساليەۆ بولدى. بۇل ونىڭ العاشقى سايلاۋى جانە ءوزىنىڭ قۇقىعىن قۋانا جۇزەگە اسىردى.

«مەن جاقىندا 18 جاسقا تولدىم جانە وسىنداي تاريحي وقيعاعا العاش رەت قاتىسۋ مەن ءۇشىن وتە قىزىقتى. وعان قوسا بۇل ۇلكەن جاۋاپكەرشىلىك، ويتكەنى مەنىڭ داۋىسىم دا كونستيتۋتسيانى جاڭارتۋدا ەسكەرىلەتىن بولادى. مەن قازاقستاننىڭ جاپونيا سياقتى دامىعان ەلگە اينالعانىن قالايمىن»، – دەدى ءاليجان.

وڭتۇستىك كورەيانىڭ استاناسىنداعى № 258 ۋچاسكەگە العاش بولىپ قازاقستاندىق وتباسى كاكىم داناباەۆ پەن ارۋنا جانىبەك كەلدى. ولار سەۋلدە 10 جىلدان استام ۋاقىت تۇرىپ، بيزنەسپەن اينالىسادى.

«مەن كورەي سەرىكتەستەرىممەن بيزنەس جۇرگىزەمىن. ولاردىڭ ءوز ەلىندەگى جاعدايدى قالاي تالقىلايتىندارىن، ساياسي ومىرگە بەلسەندى قاتىساتىنىن ءجيى كورەمىن. سوندىقتان سوڭعى 10 جىل ىشىندە مەن بىردە-ءبىر سايلاۋدى وتكىزىپ العان جوقپىن. بۇل جولى دا ءوز داۋىسىمدى بەرۋگە كەلدىم، ويتكەنى رەفەرەندۋمعا قاتىسۋ ءبىزدىڭ ازاماتتىق پارىزىمىز. ءبىزدىڭ داۋىسىمىز – بالالارىمىزدىڭ بولاشاعى»، – دەدى كاسىپكەر.

سونىمەن قاتار بەيجىڭ، شانحاي، گونكونگ، سينگاپۋر، كۋالا-لۋمپۋر، دجاكارتا، ۇلان-باتىر قالالارىندا داۋىس بەرۋ ۋچاسكەلەرى ءوز جۇمىسىن باستادى.

بىشكەك، تاشكەنت، اشحاباد جانە دۋشانبەدە سايلاۋ ۋچاسكەلەرى اشىلدى.

ۇقساس جاڭالىقتار

Back to top button