قاسىم-جومارت توقاەۆ مەملەكەتتىك تۋ كوتەرۋ راسىمىنە قاتىستى

پرەزيدەنت مەملەكەتتىك رامىزدەردىڭ 30 جىلدىعىنا ارنالعان مەملەكەتتىك تۋ كوتەرۋ سالتاناتتى راسىمىنە قاتىستى دەپ حابارلادى turkystan.kz اقورداعا سىلتەمە جاساپ.

قاسىم-جومارت توقاەۆ جيىنعا قاتىسۋشىلاردى مەملەكەتتىك رامىزدەر كۇنىمەن قۇتتىقتاپ، بۇل كۇننىڭ ەگەمەن ەلىمىز ءۇشىن ايرىقشا مەرەيلى ءارى ماڭىزدى ەكەنىن اتاپ ءوتتى. ونىڭ ايتۋىنشا، قاستەرلى تاۋەلسىزدىگىمىزدىڭ رامىزدەرى قابىلدانعانىنا ءدال بۇگىن 30 جىل تولىپ وتىر.

– قاسيەتتى نىشاندارىمىزدا قازاقتىڭ مىڭ جىلدىق ارمان-تىلەگى، ماقسات-مۇراتى تۇگەل توعىسقان. تۋ حالقىمىز ءۇشىن قاشاندا ەرلىك پەن ەلدىكتىڭ سيمۆولى سانالعان. كوك تۇرىكتەر زامانىندا بابالارىمىز ءبورىلى بايراقتىڭ توڭىرەگىنە توپتاستى. قازاق حاندىعىنىڭ تۋى بۇكىل ۇلتتى ۇيىستىردى، ەل بىرلىگىن بەكەمدەدى. ال، وتكەن عاسىردا ارىستارىمىز «الاش تۋى استىندا، كۇن سونگەنشە سونبەيمىز!» دەپ حالىققا جىگەر بەردى.   كونە داۋىردەن ميراس بولعان وسى ءداستۇر ۇرپاقتان ۇرپاققا جالعاسىپ، بۇگىنگى كۇنگە جەتتى.   قازاق ەلىنىڭ كوگىندە ۇلى دالانىڭ ايبىنىن اسىرعان تاۋەلسىزدىك تۋى جەلبىرەدى. كوك بايراعىمىز – مىزعىماس مەملەكەتتىلىكتىڭ بەلگىسى. ەلتاڭبامىز – ازاتتىقتىڭ ايشىقتى كورىنىسى. ال، ءانۇرانىمىز – ەركىندىك پەن ەلدىكتىڭ ءۇنى. تاۋەلسىزدىكتىڭ وسى ءۇش سيمۆولى حالقىمىزعا ەرەكشە رۋح بەرەدى. ارقايسىمىزدىڭ كەۋدەمىزگە ماقتانىش ۇيالاتادى. ويتكەنى، بۇل – بابالارىمىزدىڭ ورىندالعان ارمانى، – دەدى قاسىم-جومارت توقاەۆ.

پرەزيدەنت ەلىمىزدىڭ باستى قۇندىلىقتارىن قۇرمەتتەۋ – ءبارىمىزدىڭ پەرزەنتتىك پارىزىمىز ەكەنىنە نازار اۋدارىپ، وعان نەمقۇرايلى قارايتىندارعا، قادىر-قاسيەتىن تۇسىرەتىندەرگە ءبىرجولا توسقاۋىل قويۋ قاجەتتىگىن ايتتى.

– مەملەكەتتىك رامىزدەردى پايدالانۋ ءتارتىبى جونىندەگى زاڭنامانى كۇشەيتۋ ماڭىزدى. سونىمەن بىرگە، جاستارمەن جان-جاقتى ءتۇسىندىرۋ جۇمىسىن جۇرگىزگەن ءجون. بۇل – بۇكىل قوعامنىڭ مىندەتى. وسى ورايدا، بۇگىنگى سالتاناتتى ءىس-شارانىڭ تاربيەلىك ءمانى وتە زور. تۋ كوتەرۋ – اسا ماڭىزدى وقيعالارعا وراي جاسالاتىن ەرەكشە ءراسىم. حالقىمىز تاريحي تاڭداۋىن جاسايتىن ساتتە الىپ بايراعىمىزدىڭ كوكتە جەلبىرەۋىن جاقسى ىرىمعا بالايمىز، – دەدى مەملەكەت باسشىسى.

قاسىم-جومارت توقاەۆ سالتاناتتى جيىندا سويلەگەن سوزىندە مەملەكەتتىك رامىزدەر ەلدىگىمىزدىڭ جارقىن كورىنىسى، حالقىمىزدىڭ ماقتانىشى جانە ابىرويى ەكەنىن اتاپ ءوتتى. ونىڭ پىكىرىنشە، قازاقستاننىڭ تۋى، ەلتاڭباسى مەن ءانۇرانى ۇلتىمىزدىڭ ازاتتىققا، وركەندەۋگە جانە جاسامپازدىققا دەگەن تاباندى ۇمتىلىسىن بىلدىرەدى. سونىمەن قاتار بارشامىزدى مىزعىماس بىرلىككە ۇيىستىرىپ، ءاربىر ازاماتتى وتان ءۇشىن كۇندەلىكتى قاجىرلى ەڭبەك ەتۋگە جانە ۇلكەن جەتىستىكتەرگە ۇندەيدى.

– كوك تۋىمىزدى سالتاناتتى تۇردە كوتەرىپ، اتا-بابامىزدىڭ داڭقتى ءداستۇرىن جالعاستىرامىز. جەلبىرەگەن تۋىمىز تاۋەلسىزدىك مۇراتتارىنا ادال بولۋعا شاقىرىپ، ەرەكشە جىگەر بەرەدى. جاھاندىق ەكونوميكادا ءورشىپ كەلە جاتقان سىن-قاتەرلەر مەن بۇرىن-سوڭدى بولماعان گەوساياسي شيەلەنىس جاعدايىندا ءبىز مەملەكەتتىلىگىمىزدى نىعايتۋ ءۇشىن كۇش-قۋاتىمىزدى ەسەلەي ءتۇسۋىمىز كەرەك. مەملەكەتتىك رامىزدەرىمىزدى مازاق ەتۋگە، قورلاۋعا ەشقاشان جول بەرمەۋىمىز قاجەت. مۇنداي ارەكەتتەرگە بارعانداردى قاتاڭ جازالاعان ءجون. ءبىرتۇتاس حالىق رەتىندە ۇيىسا وتىرىپ، ءبىز كەز كەلگەن قيىندىقتى بىرگە جەڭىپ، ادىلەتتى، ءتيىمدى مەملەكەت قۇرا الامىز، – دەدى پرەزيدەنت.

 

قاسىم-جومارت توقاەۆ ءسوزىن قورىتىندىلاي كەلە، باس بايراعىمىزدى كوتەرگەن ساتتە ەڭ ۇزدىك كۋرسانتتارعا اسكەري شەن تاپسىرۋ يگى داستۇرگە اينالعانىن اتاپ ءوتتى.

– سىزدەر قارۋلى كۇشتەرىمىزدىڭ 30 جىلدىعىندا وفيتسەر اتانعالى تۇرسىزدار. بۇل – ۇلكەن ابىروي، زور جاۋاپكەرشىلىك.    سوندىقتان وسى مارتەبەگە لايىق بولىپ، كوپشىلىككە ۇلگى-ونەگە كورسەتۋلەرىڭىز كەرەك. تۋعان ەلدىڭ تىنىشتىعى مەن تۇتاستىعىن قورعاۋ – ءار ازاماتتىڭ قاسيەتتى بورىشى. تاۋەلسىزدىك تۋىن بيىك ۇستاۋ – وتان كۇزەتىندە تۇرعان ءاربىر ۇلاننىڭ ابىرويلى مىندەتى. ەرلىك ىستەر وسىنداي پاتريوتتىق سەزىمنەن باستاۋ الادى. سىزدەر ەل ءۇمىتىن اقتايسىزدار دەپ سەنەمىن. اسكەري شەندەرىڭىز قۇتتى بولسىن!  ەلىمىز امان، جۇرتىمىز تىنىش بولسىن! كوك بايراعىمىز ءاردايىم بيىكتە جەلبىرەسىن! – دەدى مەملەكەت باسشىسى.

سالتاناتتى ءراسىم بارىسىندا جوعارى اسكەري وقۋ ورنىنىڭ 12 ۇزدىك تۇلەگى قازاقستان پرەزيدەنتى – قازاقستان رەسپۋبليكاسىنىڭ جوعارعى باس قولباسشىسىنىڭ قولىنان وفيتسەر پوگونىن الدى.

تۋ كوتەرۋ راسىمىنە پارلامەنت سەناتىنىڭ توراعاسى ماۋلەن اشىمباەۆ، پارلامەنت ءماجىلىسىنىڭ توراعاسى ەرلان قوشانوۆ، پرەمەر-مينيستر ءاليحان سمايىلوۆ، مەملەكەتتىك حاتشى ەرلان قارين، پرەزيدەنت اكىمشىلىگىنىڭ باسشىسى مۇرات نۇرتىلەۋ، مەملەكەتتىك ورگاندار باسشىلارى، ۇكىمەت مۇشەلەرى، پارلامەنت دەپۋتاتتارى، مەملەكەتتىك رامىزدەر مەن ۆەدومستۆولىق جانە ولارعا تەڭەستىرىلگەن وزگە دە ناگرادالار گەرالديكاسى ماسەلەلەرى جونىندەگى رەسپۋبليكالىق كوميسسيا مۇشەلەرى، جوعارى اسكەري وقۋ ورىندارىنىڭ كۋرسانتتارى مەن ولاردىڭ تۋىستارى قاتىستى.

ۇقساس جاڭالىقتار

Back to top button