ماۋلەن اشىمباەۆ فرانتسيا سەناتورلارىمەن كەزدەستى

پارلامەنت سەناتىنىڭ توراعاسى ماۋلەن اشىمباەۆ «فرانتسيا-ورتالىق ازيا» دوستىق توبىنىڭ توراعاسى ەرۆە مورە باستاعان فرانتسۋز رەسپۋبليكاسى سەناتىنىڭ دەلەگاتسياسىمەن كەزدەستى دەپ حابارلادى turkystan.kz.

ماۋلەن اشىمباەۆ اڭگىمە بارىسىندا ەلىمىزدىڭ ساياسي جۇيەسىن ترانسفورماتسيالاۋعا باعىتتالعان كونستيتۋتسيالىق رەفورما تۋرالى ەگجەي-تەگجەيلى ايتىپ بەردى. سەنات توراعاسى ەل پرەزيدەنتىنىڭ باستاماسى بويىنشا جۇزەگە اسقان بارلىق وزگەرىستەردىڭ تۇپكى ماقساتى – قازاقستاندىقتاردىڭ ءومىرىن جاقسارتۋ، ساياسي باسەكەلەستىك ءۇشىن جاعداي جاساۋ جانە ءاربىر ازاماتتىڭ الەۋەتىن ىسكە اسىرۋ ەكەنىن اتاپ ءوتتى.

تاراپتار ەكى ەلدىڭ پارلامەنتارالىق قارىم-قاتىناستارىن ودان ءارى دامىتۋ جانە تەرەڭدەتۋدىڭ كەلەشەگىن ەگجەي-تەگجەيلى تالقىلادى.

«ەكى ەلدىڭ پارلامەنتتەرىندە جۇمىس ىستەيتىن دوستىق توپتارى پارلامەنتارالىق ديالوگتىڭ بەرىك نەگىزىن قۇرايدى. ءبىز «فرانتسيا – ورتالىق ازيا» پارلامەنتارالىق دوستىق توبىنىڭ قىزمەتىن تولىق قولدايمىز جانە ونىڭ جۇمىسى ءبىزدىڭ پارلامەنتارالىق بايلانىستارىمىزدى ۇلعايتۋعا ەلەۋلى ۇلەس قوسادى دەپ سانايمىز»، – دەدى ماۋلەن اشىمباەۆ.

كەزدەسۋ بارىسىندا دەپۋتاتتاردىڭ ەكونوميكا، مادەني-گۋمانيتارلىق جانە باسقا دا سالالارداعى ىنتىماقتاستىعىن تەرەڭدەتۋگە جاردەمدەسۋ ماسەلەلەرى تالقىلاندى. سەنات توراعاسى ەكولوگيا جانە ترانسشەكارالىق وزەندەر، سونىڭ ىشىندە ارال تەڭىزى پروبلەمالارىن شەشۋ جونىندەگى ءتۇرلى ەلدەر پارلامەنتشىلەرىنىڭ بىرلەسكەن كۇش-جىگەرى قاجەتتىگىنە نازار اۋداردى. ول بۇعان دەيىن فرانتسۋز سەناتورلارىنىڭ دەلەگاتسياسى – «فرانتسيا-ورتالىق ازيا» دوستىق توبىنىڭ مۇشەلەرى ارال ماسەلەسىنىڭ اۋقىمىن زەرتتەۋ ءۇشىن كوكارال بوگەتىنە بارعانىن ەسكە سالدى.

«بۇل باعىتتاعى ءوزارا ءىس-قيمىلدى قايتا باستاۋ ماڭىزدى دەپ سانايمىز. ءبىزدىڭ ەلدەرىمىزدىڭ سەناتورلارى ارال ەكوجۇيەسىن قالپىنا كەلتىرۋگە جانە ءوڭىردى ورنىقتى دامىتۋعا بايلانىستى ماسەلەلەردى قاراستىرا الار ەدى»، – دەدى ماۋلەن اشىمباەۆ.

ەرۆە مورە ءوز كەزەگىندە قازاقستاندا جۇرگىزىلىپ جاتقان رەفورمالاردى جوعارى باعالادى. ول سونداي-اق ەكى ەل پارلامەنتتەرىنىڭ ىنتىماقتاستىعىن كۇشەيتۋدىڭ ماڭىزىنا توقتالىپ، مۇنداي ءتاسىل ەكونوميكالىق، مادەني-گۋمانيتارلىق جانە باسقا دا بايلانىستاردى نىعايتۋعا وڭ ىقپال ەتەتىنىن اتاپ ءوتتى. فرانتسۋز پارلامەنتشىسى سونىمەن قاتار ارال تاعدىرى مەن ءوڭىردىڭ تۇراقتى دامۋىنىڭ باسقا دا ماسەلەلەرىن شەشۋ بويىنشا بىرلەسىپ جۇمىس ىستەۋ قاجەتتىگى تۋرالى يدەيانى قولدادى.

ۇقساس جاڭالىقتار

Back to top button