ەلوردادا مەملەكەتتىك رامىزدەردىڭ 30 جىلدىعىنا وراي Open Air كونتسەرت ءوتتى

3 ماۋسىم كۇنى نۇر-سۇلتان قالاسىندا «AMANAT» پارتياسىنىڭ ۇيىمداستىرۋىمەن مەملەكەتتىك رامىزدەردىڭ قابىلدانعانىنا 30 جىل تولۋىنا وراي ەكسپو كورمەسىنىڭ اۋماعىندا «مەنىڭ ەلىم» مەرەكەلىك كونتسەرتى ءوتتى دەپ حابارلادى turkystan.kz.

ساحنادا ەلىمىزگە ايگىلى جۇلدىزدار روزا رىمباەۆا، ۇلىقپان جولداسوۆ، «جىگىتتەر» توبى، ايقىن، Raim، قۋاندىق راحىم، سادراددين، مانسۇر جانە قوبىلاندى، «الاش ۇلى» توبى تاعى باسقا انشىلەر ءوز ونەرلەرىمەن قۋانتتى.

ءىس-شارادا وتاندىق بەلگىلى انشىلەر اننەن شاشۋ شاشىپ،  ەلوردالىقتاردىڭ كوڭىل كۇيىن كوتەردى. جاستار ءماسليحاتىنىڭ دەپۋتاتى، ەركەعالي راحماديەۆ اتىنداعى فيلارمونياسىنىڭ ءسوليسى التىنشاش مۇقاتاەۆا مەرەكەگە وراي تىڭدارماندارعا ءوزىنىڭ اۆتورلىق ءانىن شاشۋ رەتىندە ورىندادى. 

كونتسەرت

«بۇل ءانىم نەگىزى ءوزىمنىڭ ءومىر جولىم تۋرالى ءوربيدى. جالپى مەن قالاداعى بارلىق قوعامدىق ءىس-شارالاردان قالماۋعا تىرىسامىن. ويتكەنى مەملەكەتتىڭ وزگەرۋى ءاربىر ادامنىڭ العا قويعان ماقساتىنا بايلانىستى دەپ ويلايمىن. بارلىق وتانداستاردى مەرەكەمەن قۇتتىقتايمىن! تۋىمىز ارقاشان جەلبىرەپ،  ءانۇرانىمىز اسقاقتاي بەرسىن!» ،- دەدى التىنشاش مۇقاتاەۆا. 

سونداي-اق ول الداعى رەفەرەندۋمنان ۇلكەن ءۇمىت كۇتەتىنىن جەتكىزدى. «ءبىز سەكىلدى مۇمكىندىگى شەكتەۋلى ادامداردان «مۇمكىندىگى شەكتەۋلى» دەگەن تىركەستى الىپ تاستاۋىن قالايمىن. سەبەبى ادامنىڭ قولىنان كەلمەيتىن ءىس جوق دەدى ءسوزىنىڭ سوڭىندا.

ەلوردادا مەملەكەتتىك رامىزدەردىڭ 30 جىلدىعىنا وراي Open Air كونتسەرت ءوتتى

مەرەكەلىك كونتسەرتكە قاتىسۋ ءۇشىن ارنايى الماتىدان كەلگەن حالىق ءارتىسى روزا رىمباەۆا دا ءوز قۇتتىقتاۋىن جولداپ، الداعى رەفەرەندۋم جايلى دا پىكىرىن ءبىلدىردى.

روزا رىمباەۆا

«رامىزدەر مەرەكەسى – بۇل ناعىز حالىقتىق مەرەكە دەپ سانايمىن. سەبەبى ءبىزدىڭ رامىزدەرىمىز – ول ءبىزدىڭ مەملەكەتتىلىگىمىزدىڭ ايعاعى. رامىزدەر كۇنى مەرەكەسىن ءوسىپ كەلە جاتقان جاس ۇرپاق ءبىلىپ ءوسۋى كەرەك. ولاردى ارقاشان دارىپتەپ، قۋانىشتى مەرەكە رەتىندە اتاپ ءوۋىمىز كەرەك. مەن دە بۇگىنگى مەرەكەگە اندەرىممەن ۇلەسىمدى قوسامىن. مەملەكەتتىك رامىزدەرىمىزدىڭ 30 جىلدىعىمەن بارشا قازاقستاندىقتاردى شىن جۇرەكتەن قۇتتىقتايمىن!

ال 5-ءى كۇنى بولاتىن رەفەرەندۋم ءبىزدىڭ ەلىمىز ءۇشىن وتە جاۋاپتى كەزەڭ. جاڭا قازاقستاندا جاڭا ءومىر باستاۋعا قادام جاساپ جاتىرمىز. اتا زاڭىمىزعا كوپ وزگەرىستەر ەنىپ، حالىق يگىلىگى ءۇشىن جۇمىس ىستەيتىن زاڭدار قابىلدانباق. مەن ءوزىم 5-ءى كۇنى استانامىزدا رەفەرەندۋمعا قاتىسىپ، ءوز داۋىسىمدى بەرەمىن. حالقىمدى ءوز داۋىسىن بەرىپ، ەلدەگى وزگەرىستەرگە ات سالىسۋعا شاقىرامىن»، – دەدى روزا قۋانىشقىزى.

AMANAT پارتياسى «Bizbirgemiz» ەرىكتىلەر قوزعالىسىنىڭ توراعاسى، وسى شارانى ۇيىمداستىرۋعا اتسالىسقان جانداردىڭ ءبىرى پەريزات قايراتتىڭ ايتۋىنشا، بۇل مەرەكە- مەملەكەتىمىزدىڭ ەگەمەندىگى مەن بىرتۇتاستىعىن بەينەلەيدى. 

الاش ۇلى

 «مەملەكەتىمىزدىڭ رامىزدەرىن كوزىمىزدىڭ قاراشىعىنداي قورعاۋىمىز كەرەك. بۇل ءبىزدىڭ ءانۇرانىمىز،  ەلتاڭبامىز بەن مەملەكەت تۋىمىز. سوندىقتان ءبىز بۇگىن 20-عا جۋىق تانىمال وتاندىق انشىلەردى شاقىرتىپ،  ازاماتتاردىڭ رۋحىن وياتاتىن اندەردى ورىنداپ بەرۋىن قالادىق.  شىندىعىندا حالىق كونتسەرتتەن مەرەكەلىك كوڭىل-كۇيدە عانا ەمەس،  پاتريوتتىق سەزىممەن قايتۋى كەرەك»، – دەدى پەريزات قايرات. 

ۇقساس جاڭالىقتار

Back to top button