رەفەرەندۋم. بيۋللەتەندەر ۋچاسكەلەرگە جەتكىزىلدى

ورتالىق سايلاۋ كوميسسياسىنىڭ وتىرىسىندا سايلاۋ ۋچاسكەلەرىنىڭ رەفەرەندۋم كۇنى داۋىس بەرۋگە دايىندىعى تۋرالى ايتىلدى دەپ حابارلادى turkystan.kz قازاقپاراتقا سىلتەمە جاساپ.

«ارىپتەستەرىمىزدىڭ اقپاراتىنا سايكەس، ۋچاسكەلىك كوميسسيالار داۋىس بەرۋ كۇنىنە دايىن. بيۋللەتەندەر ۋچاسكەلەرگە جەتكىزىلدى. ونىڭ قاۋىپسىزدىگى قامتاماسىز ەتىلدى»، – دەدى وسك توراعاسى نۇرلان ءابدىروۆ.

سونداي-اق، ازاماتتار ەسەپتەن شىعارۋ كۋالىگىن الىپ، باسقا داۋىس بەرۋ ۋچاسكەلەرىنە ءالى دە تىركەلىپ جاتىر.

«ءاربىر ءوڭىردىڭ، وبلىستىڭ ءوز دەرەگى بار. دەگەنمەن، ەرتەڭ كەشكى ساعات 18.00-گە دەيىن كۋالىك الۋعا بولادى. وسى رەفەرەندۋمعا داۋىس بەرۋ قۇقىعى بار ازاماتتارىمىز داۋىس بەرۋ ءۇشىن ۋچاسكەلەرگە جۇگىنىپ، ەسەپتەن شىعارۋ كۋالىگىن الىپ، وزدەرىنە ىڭعايلى ۋچاسكەدە داۋىس بەرە الادى. ورتالىق رەفەرەندۋم كوميسسياسى، ەلىمىزدىڭ بارلىق وكىلەتتى ورگاندارى رەفەرەندۋم جايىندا اقپاراتتاندىرۋ ءۇشىن ءبارىن جاسادى. سونىمەن قاتار ەلەكتروندى جۇيەنى پايدالانىپ، تىزىمنەن ءوزىن تەكسەرۋ مۇمكىندىگىن بەردى»، – دەدى وسك توراعاسى نۇرلان ءابدىروۆ.

ۇقساس جاڭالىقتار

Back to top button