عالىمدار بالا قابىلەتىن جەتىلدىرۋدى تالقىلادى

حالىقارالىق جانە وتاندىق ساراپشىلار بالالار مەن جاستاردىڭ دارىندىلىعىن دياگنوستيكالاۋ مەن انىقتاۋدىڭ زاماناۋي ادىستەرىن تالقىلادى. دوڭگەلەك ۇستەل قورىتىندىسى بويىنشا قاتىسۋشىلار تاجىريبە الماسىپ، ەكىجاقتى ىنتىماقتاستىق ماسەلەلەرىن تالقىلادى جانە پراكتيكالىق ۇسىنىستار جاسادى.

نۇر-سۇلتان قالاسىندا ساراپشىلار بالالاردىڭ دارىندىلىعى مەن قابىلەتتەرىن دياگنوستيكالاۋدىڭ ماڭىزدىلىعى مەن ادىستەرى تۋرالى ايتتى. ۇيىمداستىرۋشى: «ەلباسى اكادەمياسى» كق. ماقساتى – حالىقارالىق ساراپشىلارمەن تاجىريبە الماسۋ، سونداي-اق بالالار مەن جاستاردىڭ دارىندىلىعىن، تالانتتارى مەن قابىلەتتەرىن دياگنوستيكالاۋ مەن انىقتاۋدىڭ زاماناۋي ادىستەرىن تالقىلاۋ.

«جاھاندىق باسەكەلەستىك جاعدايىندا ءبىز بالانىڭ بويىنداعى قابىلەتتەرىن ەرتە جاستان دامىتۋ جانە قولداۋ قانشالىقتى ماڭىزدى ەكەنىن تۇسىنەمىز. مىنە، ۋاقتىلى دياگنوز قويۋ ماڭىزدى ءرول اتقارادى، بۇل بالانىڭ دامۋىن ونىڭ بەيىمدىلىگى مەن قابىلەتتەرىن ەسكەرە وتىرىپ، دۇرىس باعىتتاۋعا كومەكتەسەدى. ءدال وسى ماقساتتا ءبىز بالانىڭ ءبىلىم بەرۋ الەۋەتىن بارىنشا ءدال انىقتاۋعا كومەكتەسەتىن «Qabilet» جوباسىن ازىرلەدىك»، – دەدى «ەلباسى اكادەمياسى» كق باسقارۋشى ديرەكتورى الينا حاماتدينوۆا.

«Qabilet» قابىلەتتەردى دياگنوستيكالاۋ جانە كاسىپتىك باعدارلاۋ قىزمەتى بالانىڭ قابىلەتتەرىن انىقتاۋعا جانە ونىڭ الەۋەتىن ەرتە جاستان دامىتۋعا كومەكتەسەدى. دياگنوستيكا XXI عاسىردىڭ «4ك» نەگىزگى قۇزىرەتتىلىكتەرى – كرەاتيۆتىلىك، سىني ويلاۋ، كوللابوراتسيا جانە كوممۋنيكاتيۆتىلىك بويىنشا جۇرگىزىلەدى.

حالىقارالىق ساراپشىلار بالالاردىڭ دارىندىلىعىن انىقتاۋ جانە قابىلەتتەرىن دامىتۋ بويىنشا ءوز تاجىريبەلەرىمەن ءبولىستى. اتاپ ايتقاندا، دارىندىلىقتى دامىتۋ جونىندەگى ەۋروپالىق كەڭەستىڭ مۇشەسى دوكتور بالاش كلەين پروگرەسسيۆتى Raven ماتريتسالارىنىڭ IQ تەستىنە جانە باسقا دا ونلاين باعالاۋعا ارنالعان ءاداپتيۆتى قابىلداعىشتىڭ جۇمىسىمەن ءبولىستى. سونىمەن قاتار ماريا گجەگوجەۆسكايا اتىنداعى پەداگوگيكا اكادەمياسىنىڭ ادىستەمە جانە پەداگوگيكالىق شىعارماشىلىق كافەدراسىنىڭ دوكتورى ميلوش رومانيۋك دارىندى وقۋشىلارمەن جۇمىس ىستەۋگە ارنالعان Wars جانە SAWA باعدارلاماسى تۋرالى ەگجەي-تەگجەيلى ايتىپ بەردى.

«دارىندى وقۋشىلاردىڭ ىنتاسىن، قىزىعۋشىلىقتارى مەن قابىلەتتەرىن ارتتىرىپ،  ەنتۋزيازمىن وياتاتىن، قىزىقتى ساباقتاردى وتكىزەتىن مۇعالىمدەر اسەر ەتەدى. ەرەكشە ءبىلىم بەرۋ قاجەتتىلىكتەرى بار بالالاردى قولداۋ كەرەك. مۇنداي وقۋشىلارعا جەكە وقۋ باعدارلاماسى نەمەسە جەكە وقۋ پروتسەسى  ۇسىنىلۋى مۇمكىن. ياعني، ءبىر نەمەسە بىرنەشە ءپاندى يگەرۋ ءۇشىن ساعات سانىن كوبەيتىپ، الدە مەرزىمىنەن بۇرىن ساباقتاردى ورىنداۋ قاراستىرىلادى.  جاستاردىڭ ءوزىن-ءوزى دامىتۋعا دەگەن كوزقاراسىن قالىپتاستىراتىن، كوپشىل بولۋعا ۇيرەتەتىن، وزگەلەرمەن ىنتىماقتاسۋعا دەگەن ۇمتىلىسىن كۇشەيتەتىن،  ءارتۇرلى ادىستەر قولدانىلادى»،- دەدى ميلوش رومانيۋك.

ودان كەيىن پسيحولوگيا عىلىمدارىنىڭ دوكتورى اقمارال ساتوۆا قازىرگى وقۋشىلاردىڭ قابىلەتتەرىن دياگنوستيكالاۋداعى يننوۆاتسيالىق تاسىلدەرى جايىندا ءسوز قوزعاپ، ۇسىنىس-پىكىرىن جەتكىزدى.

كەزدەسۋ سوڭىندا قاتىسۋشىلار بالالار مەن جاستاردىڭ دارىندىلىعىن دياگنوستيكالاۋ جانە قولداۋ سالاسىنداعى ەكىجاقتى ىنتىماقتاستىق ماسەلەلەرى بويىنشا ۇسىنىستار ازىرلەدى.

ۇقساس جاڭالىقتار

Back to top button