رەفەرەندۋمدا شەتەلدەگى 11 مىڭنان استام ازامات داۋىس بەرەدى

قازاقستان رەسپۋبليكاسىنىڭ رەسەيدەگى باس كونسۋلدىقتارى جانىنان داۋىس بەرۋ ۋچاسكەلەرى اشىلادى دەپ حابارلادى turkystan.kz referendum2022.kz Telegram-ارناسىنا سىلتەمە جاساپ.

اتاپ ايتقاندا، قازاقستان ازاماتتارى رەسەيدىڭ 5 قالاسىندا – ماسكەۋ، سانكت-پەتەربۋرگ، قازان، استراحان جانە ومبىدا داۋىس بەرە الادى. داۋىس بەرۋشىلەر تىزىمىنە قوسىلۋ ءۇشىن بەلگىلەنگەن ۇلگىدەگى قۇجاتتى تولتىرۋ كەرەك. سونداي-اق، داۋىس بەرۋ ۋچاسكەسىنە بارعاندا تولقۇجات نەمەسە جەكە باسىن راستايتىن كۋالىك بولۋى ءتيىس.

جالپى، رەفەرەندۋمدا 11 مىڭنان استام قازاقستاندىق شەت مەملەكەتتەردە داۋىس بەرەدى. بۇل تۋرالى سىرتقى ىستەر مينيسترلىگىنىڭ ەرەكشە تاپسىرمالار جونىندەگى ەلشىسى جالعاس ادىلباەۆ ايتتى.

«سىرتقى ىستەر مينيسترلىگى 52 شەت مەملەكەتتە 65 ۋچاسكەلىك رەفەرەندۋم كوميسسياسىن قۇردى. اتالعان كوميسسيالاردىڭ بارلىق 325 مۇشەسى قاشىقتان وقىتۋدان ءوتىپ، رەسپۋبليكالىق رەفەرەندۋمنىڭ قۇقىقتىق نەگىزدەرى مەن رەفەرەندۋم كوميسسيالارىنىڭ جۇمىسىن ۇيىمداستىرۋ باعدارلاماسى بويىنشا ارناۋلى تەستىلەۋدەن ءوتتى. قازىرگى ۋاقىتتا شەتەلدەگى 11 350 ازاماتىمىز داۋىس بەرۋگە تىركەلگەن»، – دەدى ول.

ونىڭ ايتۋىنشا، مينيسترلىك شەتەلدەگى بارلىق ۋچاسكەلەرمەن بايلانىس ورناتقان. داۋىس بەرۋ بيۋللەتەندەرى جەتكىزىلىپ جاتىر.

«قازىرگى ۋاقىتتا 55 ۋچاسكەمىز قاجەتتى ماتەريالداردى الدى. قالعان ۋچاسكەلەرگە بيۋللەتەن كەشكە قاراي تولىق جەتكىزىلەدى دەپ وتىرمىز»، – دەدى جالعاس ادىلباەۆ.

ال ەلىمىزدە رەفەرەندۋمدى وتكىزۋگە بايلانىستى جان-جاقتى دايىندىق بولىپ جاتىر.

 

ۇقساس جاڭالىقتار

Back to top button