بيىل 5،6 مىڭنان استام ەتنيكالىق قازاق قانداس مارتەبەسىن الدى

1 ماۋسىمداعى جاعداي بويىنشا 5 679 ەتنيكالىق قازاق قانداس مارتەبەسىن الدى دەپ حابارلادى turkystan.kz ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ. 

«جىل باسىنان بەرى قازاقستانعا كەلگەن قانداستاردىڭ جارتىسىنان كوبى، ناقتىراق ايتقاندا، 68،7%-ى وزبەكستاننان، 10،4% – قىتايدان، 8،8% – تۇرىكمەنستاننان، 2،6% – موڭعوليادان جانە 9،5% باسقا ەلدەردەن قونىس اۋدارعان. كەلگەن ەتنيكالىق قازاقتار نەگىزىنەن الماتى (31،1%)، ماڭعىستاۋ (18،8%)، تۇركىستان (10،3%) جانە جامبىل (6،2%) وبلىستارىنا، سونداي-اق الماتى (6%)، نۇر-سۇلتان (6،9%) جانە شىمكەنت (7،9%) قالالارىنا قونىستاندى»، – دەلىنگەن مينيسترلىك مالىمەتىندە.

ۆەدومستۆونىڭ ساراپتاۋىنشا، ەڭبەككە قابىلەتتى جاستاعى ەتنيكالىق قونىس اۋدارۋشىلار – 63،2%، ەڭبەككە قابىلەتتى جاستان كىشى قونىس اۋدارۋشىلار – 22،8% جانە زەينەتكەرلەر – 14%. ال، ەڭبەككە قابىلەتتى جاستاعى قانداستاردىڭ 11،4%-ى – جوعارى، 40،3%-ى – ورتا كاسىبي، 46،6%-ى – جالپى ورتا ءبىلىمدى جانە 1،7%-نىڭ ءبىلىمى جوق.

ايتا كەتسەك، 1991 جىلدان بەرى رەسپۋبليكاعا 1 ملن 93،5 مىڭ ەتنيكالىق قازاق ورالعان. بۇعان دەيىن حابارلانعانىنداي، قازاقستان رەسپۋبليكاسىنىڭ اۋماعىنا بۇرىن تۇرعان جانە قايتا كەلگەن ەتنيكالىق قازاقتار eGov.kz پورتالىندا قانداس مارتەبەسىن الۋعا نەمەسە ونى ۇزارتۋعا ءوتىنىم بەرە الادى.

ۇقساس جاڭالىقتار

Back to top button