نيۋ-دەليدە اباي ءبيۋستى قويىلدى

2 ماۋسىمدا ءۇندىستاننىڭ نيۋ-دەلي قالاسىنداعى سان مارتين پارك سكۆەرىندە قازاقتىڭ ۇلى ويشىلى اباي قۇنانباەۆ ءبيۋستىنىڭ سالتاناتتى اشىلۋ ءراسىمى ءوتتى دەپ حابارلادى turkystan.kz.

ءىس-شارا پرەمەر-ءمينيستردىڭ ورىنباسارى – ساۋدا جانە ينتەگراتسيا ءمينيسترى باقىت سۇلتانوۆتىڭ، ءۇندىستاننىڭ سىرتقى ىستەر جانە مادەنيەت مەملەكەتتىك ءمينيسترى ميناكشي لەكحيدىڭ، سونداي-اق ديپلوماتيالىق كورپۋس وكىلدەرىنىڭ قاتىسۋىمەن ءوتتى.

«اباي – ۇلى اقىن عانا ەمەس، كەمەڭگەر ويشىل، ايگىلى اعارتۋشى. ول جۇرتتى عىلىم يگەرۋگە، ءبىلىمدار بولۋعا ۇندەدى. جاڭاشىلدىق پەن جاسامپازدىقتى دارىپتەدى. اباي مۇراسى – ءبىزدىڭ ەلىمىزگە عانا ەمەس، بارشا ادامزاتقا ورتاق قۇندىلىق»، – دەدى مينيستر باقىت سۇلتانوۆ.

ول ماحاتما گانديدىڭ تۋعان جەرىنە قازاق اعارتۋشىسىنىڭ ءبيۋستىن ورناتۋ تەرەڭ سيمۆولدىق مانگە يە ەكەنىن اتاپ ءوتتى. اباي مەن گاندي يدەيالارى ءبىر-بىرىمەن تىعىز بايلانىستى.

باقىت سۇلتانوۆ اباي ءبيۋستىنىڭ ورناتىلۋى ەكى ەل اراسىنداعى رۋحاني ىنتىماقتاستىقتى ودان ءارى نىعايتا تۇسەتىنىن اتاپ ءوتتى. سونداي-اق تاراپتار ءبىلىم، عىلىم جانە مادەنيەت سالاسىنداعى ىنتىماقتاستىقتى دامىتۋدى جالعاستىرادى.

نيۋ-دەلي قالاسىندا اباي ءبيۋستىنىڭ اشىلۋىنا ارنالعان سالتاناتتى ءىس-شارا قازاقستان رەسپۋبليكاسى مەن ءۇندىستان رەسپۋبليكاسى اراسىنداعى ساۋدا-ەكونوميكالىق، عىلىمي-تەحنيكالىق، ونەركاسىپتىك جانە مادەني ىنتىماقتاستىق جونىندەگى ۇكىمەتارالىق كوميسسيانىڭ 14-وتىرىسىنا قاتىسۋ ءۇشىن قازاقستان رەسپۋبليكاسى دەلەگاتسياسىنىڭ ۇندىستانعا ساپارى شەڭبەرىندە ءوتتى.

ۇقساس جاڭالىقتار

Back to top button