5 ماۋسىم كۇنى «رەفەرەندۋم» ونلاين مارافونى ۇيىمداستىرىلادى

«قازاقستان» تەلەراديوكورپوراتسياسى 2022 جىلعى 5 ماۋسىم رەسپۋبليكالىق رەفەرەندۋم كۇنى نۇر-سۇلتان قالاسىندا ەل كولەمىندەگى ەڭ اۋقىمدى «رەفەرەندۋم»  ونلاين مارافونىن ۇيىمداستىرادى دەپ حابارلادى turkystan.kz.

قازاقستاندىق مەديا كەڭىستىگىندەگى تۇڭعىش ساياسي شارا تاڭعى ساعات 09:00-دەن باستاپ تۇنگى 01:00-گە دەيىن جالعاسادى جانە وتاندىق باق-تاردىڭ ينتەرنەت رەسۋرسى مەن الەۋمەتتىك جەلىدەگى پاراقشالارىندا ونلاين-ترانسلياتسيالانادى.

ونلاين مارافوننىڭ نەگىزگى ماقساتى – رەفەرەندۋم بارىسىنان جەدەل اقپاراتتار بەرۋ، قوعامنىڭ ءتۇرلى توپتارىنا ساياسي پىكىرتالاس الاڭىن ۇسىنۋ، داۋىس بەرۋدىڭ الدىن الا قورىتىندىسىن اشىق تالقىلاۋ. مارافون بارىسىندا ءار سالانىڭ وكىلدەرى جانە ەكسپەرتتەردىڭ قاتىسۋىمەن بريفينگتەر، داۋىس بەرۋ بارىسى تۋرالى ەلىمىزدىڭ بارلىق وڭىرىنەن تىكەلەي قوسىلىمدار، ديسكۋسسيا الاڭدارى ۇيىمداستىرىلادى.

ديسكۋسسيا الاڭىنداعى تالقىلاۋلار رەسپۋبليكالىق تەلە جانە راديوارنالاردان تىكەلەي ەفيردە بەرىلەدى.

شاراعا دەپۋتاتتار، ساياساتتانۋشىلار، ۇكىمەتتىك ەمەس ۇيىم وكىلدەرى، ءار سالاداعى بەلسەندى جاستار مەن مادەنيەت، سپورت سالاسىنىڭ وكىلدەرى جانە جۋرناليستەر قاتىسادى.

ۇقساس جاڭالىقتار

Back to top button