«الماتى – ميلان» اۋە رەيسى اشىلادى

پرەمەر-ءمينيستردىڭ ورىنباسارى – سىرتقى ىستەر ءمينيسترى مۇحتار تىلەۋبەردىنىڭ ريم قالاسىندا يتاليانىڭ سىرتقى ىستەر جانە حالىقارالىق ىنتىماقتاستىق ءمينيسترى لۋيدجي دي مايومەن كەزدەسۋىندە اپتاسىنا 2 رەت قاتىنايتىن «الماتى – ميلان» اۋە رەيسىن ورىنداۋ ماڭىزدىلىعىن اتاپ ءوتتى دەپ حابارلادى turkystan.kz.

«يتاليا – قازاقستاننىڭ ەۋروپاداعى باستى ساۋدا سەرىكتەستەرىنىڭ ءبىرى. ءبىز ءسىزدىڭ ەلىڭىزبەن ىنتىماقتاستىققا ۇلكەن ءمان بەرەمىز. ديپلوماتيالىق قاتىناستاردىڭ 30 جىلى ىشىندە ءبىز جاقسى ناتيجەلەرگە قول جەتكىزدىك»، – دەدى م.تىلەۋبەردى.

ءوز كەزەگىندە مينيستر ل. دي مايو يتاليالىق تاراپ ءوزارا ءتيىمدى ىنتىماقتاستىقتى كەڭەيتۋگە جانە جوعارى دەڭگەيدەگى ساپارلارمەن الماسۋعا مۇددەلى ەكەنىنە سەندىردى.

«قازاقستان – ەۋروپالىق وداقپەن كەڭەيتىلگەن ارىپتەستىك پەن ىنتىماقتاستىق تۋرالى كەلىسىمگە قول قويعان ورتالىق ازياداعى جالعىز ەل. ءبىز ورتالىق ازيا وڭىرىندەگى سەنىمدى سەرىكتەسىمىزبەن الداعى ۋاقىتتا دا ءوزارا ءىس-قيمىل جاساۋعا دايىنبىز»، – دەپ اتاپ ءوتتى يتالياندىق مينيستر.

ءىس-شارا بارىسىندا «الماتى – ميلان» باعىتى بويىنشا اپتاسىنا 2 رەت جيىلىكپەن تىكەلەي اۋە قاتىناسىن اشۋدىڭ ماڭىزدىلىعى اتاپ ءوتىلدى. بۇل ەكى ەلدىڭ ساۋدا-ەكونوميكالىق بايلانىسىن دامىتۋعا ىقپال ەتەدى دەگەن ءۇمىت بار.

ايتا كەتسەك، يتاليا – قازاقستان ەكونوميكاسىنىڭ ءىرى ينۆەستورلارىنىڭ ءبىرى. قر ۇلتتىق بانكىنىڭ دەرەكتەرى بويىنشا 2021 جىلى يتاليادان تىكەلەي شەتەلدىك ينۆەستيتسيا كولەمى 122،8 ملن اقش دوللارعا جەتتى. ەلدەر اراسىنداعى ءوزارا تاۋار اينالىمىنىڭ كولەمى 2021 جىلى 9،6 ملرد دوللار (ەكسپورت – 8،8 ملرد جانە يمپورت – 0،8 ملرد) توڭىرەگىندە.

ۇقساس جاڭالىقتار

Back to top button