بالالاردى قاۋىپتى جاعدايدا قالدىرعاندار 45 تاۋلىككە قاماۋعا الىنادى

بالاسىن قاۋىپتى جاعدايدا قالدىرعان اتا-انا زاڭ بويىنشا جاۋاپكەرشىلىككە تارتىلادى. ياعني قوماقتى سومادا ايىپپۇل تولەيدى نەمەسە قاماۋعا الىنادى دەپ حابارلادى turkystan.kz ينفورمبيۋرو جاڭالىقتار قىزمەتىنە سىلتەمە جاساپ.

دەنساۋلىعىنا زيان كەلتىرسە نەمەسە بالا ۇلكەندەر كىناسىنەن قايتىس بولعان جاعدايدا باس بوستاندىعىنان ايىرۋ جازاسى دا قاراستىرىلعان.

تەك بيىلدىڭ وزىندە نۇر-سۇلتان قالاسىندا توعىز بالا تەرەزەدەن قۇلاعان ەكەن. بۇلدىرشىندەر امان قالعان. ال پاۆلوداردا 9-قاباتتان قۇلاعان ءبىر جارىم جاستاعى ءبۇلدىرشىنىڭ ءومىرىن دارىگەرلەر ساقتاپ قالا المادى. بۇدان بولەك، وسكەمەندە دە ءتورت جاسار بالا 3-قاباتتان قۇلاپ كەتكەن ەدى.

ءبىر وكىنىشتىسى، مۇنداي وقىس جاعدايلار ەلىمىزدىڭ ءار وڭىرىندە تىركەلىپ جاتىر. ال قۇزىرلى ورگان وكىلدەرىنىڭ ايتۋىنشا، جازاتايىم وقيعالاردىڭ باسىم بولىگى اتا-انالاردىڭ بالا قاۋىپسىزدىگىنە نەمقۇرايلى قاراعانىنان بولادى. ءبۇلدىرشىن ومىرىنە الدىمەن اتا-انا جاۋاپتى ەكەنىن ۇلكەندەر دە مويىندايدى.

زاڭ بويىنشا دارمەنسىز ادامدى جالپى بالالاردى قاۋىپتى جاعدايدا قالدىرۋ 100 ايلىق ەسەپتىك كورسەتكىشكە دەيىن، ياعني 300 مىڭ تەڭگە كولەمىندە ايىپپۇل سالۋمەن، قوعامدىق جۇمىس نەمەسە 45 تاۋلىككە دەيىن قاماۋعا الۋمەن جازالانادى.

«بالانى قاۋىپتە قالدىرىپ كەتكەنى ءۇشىن قىلمىستىق كودەكسىنىڭ 19-بابى بويىنشا جاۋاپقا تارتۋ قاراستىرىلعان. ءومىرى مەن دەنساۋلىق جاعدايىنا قاۋىپ تونگەن ادامدى كومەكسىز، قاساقانا تاستاپ كەتۋ جاۋاپكەرشىلىككە تارتۋدىڭ نەگىزگى بەلگىسى ەكەنىن اتاپ وتكىم كەلەدى»، – دەدى ىىم اكىمشىلىك پوليتسيا كوميتەتى باسقارما باستىعىنىڭ ورىنباسارى جاسۇلان جۇمانالين.

ەگەر بالا دەنساۋلىعىنا ورتاشا نەمەسە اۋىر زيان كەلسە، 6 ميلليون تەڭگەدەن اسا ايىپپۇل سالىنىپ، ەكى جىلعا باس بوستاندىعىنان ايىرىلادى. ال ەگەر ءبۇلدىرشىن قايتىس بولسا اتا-اناسى ءۇش جىلعا دەيىن قاماۋعا الىنادى.

ۇقساس جاڭالىقتار

Back to top button