30 جىل: «مەملەكەتتىلىكتىڭ رامىزدەرى» حالىقارالىق عىلىمي كونفەرەنتسياسى ءوتتى

قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىندا مەملەكەتتىك رامىزدەرىمىزدىڭ 30 جىلدىعىنا قارساڭىندا «مەملەكەتتىلىكتىڭ رامىزدەرى» حالىقارالىق عىلىمي كونفەرەنتسياسى ءوتتى.

كونفەرەنتسيا وسكەلەڭ ۇرپاقتىڭ ەلىمىزدىڭ مەملەكەتتىك رامىزدەرىمىزگە قۇرمەتپەن قاراۋىن نىعايتۋدى كوزدەيدى.

«كەز كەلگەن ەل ءۇشىن مەملەكەتتىك رامىزدەر تاۋەلسىزدىكتى ايقىندايتىن اتريبۋت قانا ەمەس، بۇل تەرەڭ الەۋمەتتىك-مادەني جانە ساياسي تۇسىنىكتەر جۇيەسى. ولار تاريحقا نەگىزدەلىپ، ۇلتتىق جادتى ساقتاپ وتىرادى. مەملەكەتتىك رامىزدەر – ەل كەلبەتىنىڭ قۇرامداس بولىگى، ازاماتتار ءپاتريوتيزمىنىڭ كورىنىسى، بۇكىل قوعامدى بىرىكتىرەتىن فاكتورى، كەز كەلگەن ۇلت پەن مەملەكەتتىڭ بولمىسىن قالىپتاستىرۋدىڭ قۇرامداس بولىگى. مەملەكەت باسشىسى قاسىم-جومارت توقاەۆ جاريالاعان جاڭا قازاقستاندى قۇرۋدا مەملەكەتتىك رامىزدەردىڭ بەينەلىك مازمۇنىن قايتا قاراۋ قاجەتتىلىگى وزەكتى بولىپ وتىر. كونفەرەنتسيا بارىسىندا قوعامنىڭ الەۋمەتتىك-مادەني قاتىناسىنىڭ نەگىزى رەتىندەگى ساياسي رامىزدەردىڭ رولىنە قاتىستى ماسەلەلەردىڭ كەڭ اۋقىمىن تالقىلاۋ كۇتىلۋدە: جاھاندانۋ داۋىرىندەگى مەملەكەتتىك يدەولوگيا مەن ۇلتتىق يدەيانىڭ ماڭىزى; وسكەلەڭ ۇرپاققا پاتريوتتىق تاربيە بەرۋ جانە ت.ب.»، – دەپ ەلباسى كىتاپحاناسىنىڭ ديرەكتورى باقىتجان تەمىربولات ءىس-شارانى اشتى.

30 جىل: «مەملەكەتتىلىكتىڭ رامىزدەرى» حالىقارالىق عىلىمي كونفەرەنتسياسى ءوتتى

قازاقستان رەسپۋبليكاسىنىڭ مادەنيەت جانە سپورت ۆيتسە-ءمينيسترى نۇرعيسا داۋەشوۆ مەملەكەتتىك حاتشى ەرلان قاريننىڭ قاتىسۋشىلارعا جولداعان ءسوزىن وقىدى.

«قۇرمەتتى كونفەرەنتسياعا قاتىسۋشىلار! بيىل مەملەكەتتىلىگىمىزدىڭ مارتەبەلى سيمۆولى مەملەكەتتىك رامىزدەردىڭ قابىلدانعانىنا 30 جىل! وتاندى قاستەرلەۋ، تۋعان ەلگە دەگەن شىنايى قۇرمەت – مەملەكەتتىك رامىزدەردى قادىرلەۋدەن باستالادى. مەملەكەتتىك رامىزدەر –  ەلدىكتىڭ، ەگەمەندىكتىڭ باستى نىشانى، ۇلتتىق رۋح پەن قوعامدىق كەلىسىمنىڭ، سونداي-اق پاتريوتتىق تاربيەنىڭ اسا ماڭىزدى قۇرالى. كوك بايراعىمىز كوكتە جەلبىرەپ، ەلتاڭبامىز ەل تورىندە نىق تۇرىپ، ءانۇرانىمىز اسپاندا قالىقتاسا – ول مەملەكەت مەرەيىنىڭ ۇستەم، مارتەبەسى بيىك ەكەنىن، حالقىمىزدىڭ بىرلىك پەن بەرەكەدە ءومىر ءسۇرىپ جاتقانىن ايعاقتايدى. بۇگىن ءوتىپ وتىرعان «مەملەكەتتىلىكتىڭ رامىزدەرى» حالىقارالىق عىلىمي كونفەرەنتسياسى وسى ىسكە ەلەۋلى ۇلەس قوسادى دەپ سەنەمىز. سىزدەرگە شىعارماشىلىق تابىس تىلەيمىن. ەلىمىزدىڭ ءوسىپ-وركەندەۋى جولىنداعى جاسامپاز جۇمىستارىڭىز جەمىستى بولسىن!»، – دەلىنگەن وندا.

«بۇگىن ءبىز اسا ماڭىزدى تاقىرىپتى تالقىلاپ وتىرمىز، ويتكەنى مەملەكەتتىك رامىزدەر قازىرگى جاستار ءۇشىن ولاردىڭ ۇلتقا قاتىستىلىعىن كوديفيكاتسيالاۋ تۇرعىسىنان شەشۋشى مانگە يە. قازاقستاندىقتاردىڭ قازىرگى جاس ۇرپاعى بەلسەندى ازاماتتىق ۇستانىمعا يە جانە بارلىق دەڭگەيدەگى شەشىمدەر قابىلداۋعا قاتىسقىسى كەلەدى، ولار ءوز داۋىستارىنىڭ ەستىلۋىن قالايدى. ال ءبىز ولاردىڭ باستامالارىن جۇزەگە اسىرۋعا مۇمكىندىك بەرۋىمىز كەرەك. وسى ماقساتتا پرەزيدەنت جانىنداعى جاستار ساياساتى جونىندەگى كەڭەس مۇشەلەرىمەن، سونداي-اق ازاماتتىق قوعام مەن ساراپشىلىق قوعامداستىق وكىلدەرىمەن بىرلەسىپ، جاستار ساياساتىنىڭ جاڭا تۇجىرىمداماسى ازىرلەنەتىن بولادى. بۇل تۇجىرىمداما – جاستار قوزعالىسىنىڭ بولاشاق جاھاندىق باعىتىن مەن كوزقاراسىن ايقىندايتىن قۇجات»، – دەدى قازاقستان رەسپۋبليكاسىنىڭ اقپارات جانە قوعامدىق دامۋ ۆيتسە-ءمينيسترى الەكساندر دانيلوۆ.

«اتا-بابالارىمىزدىڭ، بارلىقتارىمىزدىڭ اتتارى ەلتاڭبانىڭ ىشىندە جازىلعان. ءبىزدىڭ ەلتاڭبامىز – قادىر قاسيەتى بار، مىڭ جىلدار بويى كەلە جاتقان تاريحىمىز، رۋحىمىز بەن سانامىز، داستۇرلەرىمىز بەن ۇلى دالانىڭ فيلوسوفياسىن بويىنا سىڭىرگەن ءرامىز. جاڭا داۋىردە، جاڭا قازاقستاندا مەملەكەتتىك رامىزدەردى ناسيحاتتاۋدىڭ تىڭ تاسىلدەرىن قولدانۋ كەز كەلدى. مەنىڭ ويىمشا، ءبىزدىڭ ەلتاڭبا، تۋ مەن ءانۇرانىمىز ءاربىر رەسمي جانە بەيرەسمي ءىس-شارادا، جەردە قولدانىلۋ ءتيىس. سول كەزدە رامىزدەرىمىز جاستار اراسىندا كەڭىنەن تارايدى»، – دەدى قازاقستان رەسپۋبليكاسى مەملەكەتتىك ەلتاڭباسىنىڭ اۆتورى جانداربەك مالىبەكوۆ.

ءىس-شارا بارىسىندا نۇرسۇلتان نازارباەۆ قورى اتقارۋشى ديرەكتورىنىڭ ورىنباسارى الكەي مارعۇلان ۇلى، قاۋىپسىزدىكتى زەرتتەۋ جونىندەگى دجوردج مارشالل اتىنداعى ەۋروپالىق ورتالىقتىڭ پروفەسسورى، ەميريتۋس ۋنيۆەرسيتەتىنىڭ پروفەسسورى گرەگوري گليسون (نيۋ-مەكسيكو، اقش)، ازەربايجان رەسپۋبليكاسى پرەزيدەنتى اكىمشىلىگىنىڭ ساياسي پارتيالار مەن زاڭ شىعارۋشى بيلىكپەن بايلانىستار ءبولىمىنىڭ مەڭگەرۋشىسى، ساياسي عىلىمداردىڭ كانديداتى ۋسۋباليەۆ اسيف اديلوگلى، ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ الەۋمەتتىك-مادەني دامۋ جونىندەگى پرورەكتورى ديحان قامزابەك ۇلى، م.قوزىباەۆ اتىنداعى سولتۇستىك قازاقستان ۋنيۆەرسيتەتىنىڭ يننوۆاتسيا، ينتەرناتسيونالداندىرۋ جانە ترانسفورماتسيا جونىندەگى باسقارما مۇشەسى، «قازاقستاننىڭ 100 جاڭا ەسىمى» جوباسىنىڭ جەڭىمپازى دامەل مەكتەپباەۆا، ت.ب. بايانداما وقىدى.

ونلاين جانە وففلاين ۇلگىدە وتكەن كونفەرەنتسياعا 200-گە جۋىق  ادام قاتىستى. ولاردىڭ قاتارىندا جوعارعى وقۋ ورىندارىنىڭ پروفەسسورلارى مەن وقىتۋشىلارى، ورتا وقۋ ورىندارىنىڭ مۇعالىمدەرى، ساراپشىلار مەن قوعام قايراتكەرلەرى، ستۋدەنتتەر مەن ماگيسترانتتار بار.

عىلىمي كونفەرەنتسيانىڭ قورىتىندىسى بويىنشا ەلىمىزدىڭ مەملەكەتتىك رامىزدەرىمىزدى مەملەكەت ىشىندە جانە شەكارادان تىس جۇرگەن جاستاردىڭ اراسىندا ناسيحاتتاۋدىڭ ۇسىنىستارى ازىرلەندى.

ۇقساس جاڭالىقتار

Back to top button