قاسىم-جومارت توقاەۆ ورتالىق ازيا ەكولوگيالىق زەرتتەۋلەر ينستيتۋتىندا بولدى

مەملەكەت باسشىسى ورتالىق ازيا ەكولوگيالىق زەرتتەۋلەر ينستيتۋتىن ارالاپ كوردى، دەپ حابارلايدى turkystan.kz اقوردانىڭ رەسمي سايتىنا سىلتەمە جاساپ.

قاسىم-جومارت توقاەۆ الەمدىك زاماناۋي تەحنولوگيالارمەن جابدىقتالعان ينستيتۋتتىڭ جاڭا عيماراتىنا بارىپ، مەكەمە جۇمىسىمەن تانىستى.

بۇل عيمارات ءوزىن-ءوزى سۋمەن جانە ەلەكتر قۋاتىمەن تولىق قامتاماسىز ەتۋگە مۇمكىندىك بەرەدى. ىرگەسى 2012 جىلى قالانعان ينستيتۋت قورشاعان ورتانى قورعاۋ جانە ESG – ەكولوگيا، الەۋمەتتىك ساياسات جانە كورپوراتيۆتىك باسقارۋ سالاسىندا ىرگەلى جانە قولدانبالى عىلىمي زەرتتەۋ جۇمىستارىن جۇرگىزىپ كەلەدى.

پرەزيدەنتكە ينستيتۋت جۇمىسىنداعى مۇناي-حيميا ونەركاسىبىنىڭ قالدىقتارىن قايتا وڭدەۋ، سۋ قويمالارىن تازالاۋ جانە سۋ قورىن جيناۋ، كاسپي يتبالىعىن زەرتتەۋ جانە وڭالتۋ سياقتى 3 نەگىزگى باعىت تانىستىرىلدى.

قاسىم-جومارت توقاەۆ كاسپي يتبالىعىنىڭ ازايىپ كەتۋ سەبەبىن زەردەلەپ، وسى باعىتتا ىرگەلى زەرتتەۋلەر جۇرگىزۋ قاجەت ەكەنىن اتاپ ءوتتى. پرەزيدەنت وسى وزەكتى ماسەلەنى ءوز باقىلاۋىنا الاتىنىن ايتتى.

120-دان استام عالىم مەن ساراپشى قىزمەت ەتەتىن ينستيتۋتتىڭ زاماناۋي قۇرال-جابدىقتارمەن قامتاماسىز ەتىلگەن جەكە زەرتحاناسى بار. جەتەكشى حالىقارالىق عىلىمي ورتالىقتارمەن بەلسەندى ىنتىماقتاستىق ورناتقان زەرتتەۋ مەكەمەسىنىڭ باسشىلىعى وتاندىق كومپانيالاردىڭ ستراتەگياسى مەن قىزمەتىنە ESG قاعيداتتارىن ەنگىزۋگە اتسالىسىپ جاتقانىن جەتكىزدى.

مەملەكەت باسشىسىنا وزەكتى ەكولوگيالىق ماسەلەلەرگە قاتىستى بىرقاتار تەحنولوگيا ازىرلەنگەنى جونىندە باياندالدى. قۇرىلتايشىلاردىڭ ايتۋىنشا، مۇناي-گاز ونەركاسىبىنىڭ توپىراققا، جانۋارلار دۇنيەسىنە جانە جالپى قورشاعان ورتاعا تيگىزەتىن زيانىن جوققا شىعارۋعا بولمايدى. سوندىقتان اتالعان ينستيتۋتتا توپىراقتى مۇناي ونىمدەرىنىڭ زياندى اسەرىنەن زالالسىزداندىرۋ ادىستەرى ازىرلەنىپ، پاتەنتتەلگەن.

 

ۇقساس جاڭالىقتار

Back to top button