توقاەۆ قازاقستاندىقتاردى حالىقارالىق بالالاردى قورعاۋ كۇنىمەن قۇتتىقتادى

مەملەكەت باسشىسى قازاقستاندىقتاردى حالىقارالىق بالالاردى قورعاۋ كۇنىمەن قۇتتىقتادى دەپ حابارلادى turkystan.kz اقورداعا سىلتەمە جاساپ.

«قۇرمەتتى وتانداستار!

حالىقارالىق بالالاردى قورعاۋ كۇنى – ەرەكشە قۋانىش پەن مەيىرىمگە تولى شۋاقتى مەيرام.   

بالانىڭ كۇلكىسى مەن باقىتىنان ارتىق ەشتەڭە جوق ەكەنىن وسى مەرەكەدە ءبارىمىز ايقىن سەزىنەمىز.   

وسكەلەڭ ۇرپاقتىڭ جان-جاقتى دامۋىنا قولايلى جاعداي جاساۋ – مەملەكەتىمىزدىڭ باستى مىندەتىنىڭ ءبىرى.

ءبىز زاماناۋي مەكتەپتەر مەن جايلى بالاباقشالار سالىپ، يننوۆاتسيالىق ورتالىقتار، وقۋشىلار سارايلارىن جانە سپورت كەشەندەرىن اشىپ جاتىرمىز. ۇيىرمەلەر مەن سەكتسيالار دا  ۇيىمداستىرىلعان.     

«بالالار جىلى» اياسىندا كوپتەگەن جاڭا جوبالار قولعا الىندى. ءاربىر بالانىڭ تالابىن ۇشتاپ، دارىنىن اشۋدى كوزدەيتىن ءتۇرلى ءىس-شارالار جۇزەگە اسىرىلۋدا.

مەملەكەت جىلدان-جىلعا بۇل باعىتتاعى جۇمىستى كۇشەيتە تۇسەدى. ويتكەنى، جاس ۇرپاقتىڭ مىقتى ازامات بولىپ ءوسۋى  ەلىمىزدىڭ تۇراقتى دامۋىنا جانە باياندى بولاشاعىنا جول اشادى.   

جاس قازاقستاندىقتاردى جانە بارشا جۇرتتى وسى جارقىن مەرەكەمەن قۇتتىقتايمىن!

سىزدەرگە زور دەنساۋلىق، باق-بەرەكە تىلەيمىن!»، – دەلىنگەن قاسىم-جومارت توقاەۆتىڭ قۇتتىقتاۋ سوزىندە.

 

ۇقساس جاڭالىقتار

Back to top button