«Астана кештерi» халықаралық өнер фестивалі әлемдік премьераны көрсетті

«Астана кештерi» халықаралық өнер фестивалі әлемдік премьераны көрсетті

«Астана кештерi» халықаралық өнер фестивалі әлемдік премьераны көрсетті
ашық дереккөзі
«Астана кештерi» ХI халықаралық фестивалінің алғашқы концертінде Француз композиторы Пьер Тиллуа жазған қобыз бен скрипкаға арналған «Бақсы сиқыры» атты жаңа туындының премьерасы өтті. Әлемдік премьераны Франциядан келген қобызшы Айгерим Ерсаинова-Шустер мен скрипкашы Квентин Фогель орындады. Сондай-ақ бұл кеште белгілі қазақстандық және шетелдік өнер жұлдыздары француз композиторының фортепианолық және ансамбльдік туындыларын шырқады. Белгілі пианист, Қазақстанның еңбек сіңірген қайраткері Тимур Урманчеев, альт аспабында ойнаған Анна Серова (Италия), скрипкашы Шолпан Манкеева, виолончелист Мұрат Нарбеков  пен пианист Дина Мирманованың шеберлігі зор ықыласқа бөленді. Музыканттар Пьер Тиллуа шығармаларының әуені мен көркемдік алуан түрлілігі ерекше екендігін атап өтті.  width= Француз авторы қазақ музыкасы негізінде ұлттық аспаптарда орындалатын көптеген композицияларды жазды. Автордың айтуынша, қобыздың үні оған ерекше әсер еткен.
«Қобыздың үні мені бірден баурап алды. Оның қайталанбас әуендері «Бақсы сиқыры» атты қобыз бен скрипкаға арналған шығарманың жазылуына шабыт берді. Бұл – менің Қазақстан еліне деген құрметімді білдіретін арнайы тартуым. Қазақстанға алғаш рет келіп, осы керемет елдің астанасында шығармашылық кешімді өткізу – мен үшін үлкен мәртебе», - деді Пьер Тиллуа. Ол фестивальдің ұйымдастырушысы – «Дегдар» гуманитарлық қорына өз алғысын білдірді.
«Дегдар» қорының директоры Лаура Ахметова Француз композиторының музыкасы өнерде шекара болмайтынын тағы бір дәлелдей түскенін айтты.
«Пьер Тиллуаның шығармашылығы көп қырлы. Оның Франция төрінде туған әуендерінде Азия үні естіледі. Композитор қазақ музыкасын өте жақын қабылдады. Жалпы, жыл сайын фестиваль аясында сан түрлі мемлекеттің музыкалық өнерін өзара жақындастыратын ерекше концерттер өтеді. Демек, музыка өнері айналамызды жарқын етіп, бірлігімізді арттыра түсетін алып күшке ие», - деді Лаура Ахметова.
Айта кетсек, алдағы уақытта «Астана кештері» өнер фестивалінің тағы 3 концерті «Астана балет» театрында өтеді және көрермендер оларды тегін тамашалай алады. Билеттерді тегін алу үшін: тел. +77758990712.