Қызметінен қуылған Досаев Президентке хат жазды

Қызметінен қуылған Досаев Президентке хат жазды

Қызметінен қуылған Досаев Президентке хат жазды
ашық дереккөзі
Тараз қаласының бұрынғы әкімі Қайрат Досаев Президент Қасым-Жомарт Тоқаевқа хат жазып, «Жаңа Қазақстанды» құруға атсалысқысы келетінін айтты деп хабарлады turkystan.kz  7kun.kz сайтына сілтеме жасап. Қайрат Досаев – Алматы әкімі Ерболат Досаевтың туған бауыры. Өмірімнің 20 жылын мемлекеттік қызметке арнадым деген ол өзінің Facebook парақшасы арқылы Қасым-Жомарт Тоқаевқа хат жолдады. Хат орыс тілінде. Онда өзінің қызмет жолын, адал қызмет еткенін, Президентке әлдекімдер жалған ақпарат жеткізгенін жазыпты.
«Қазір мені болған оқиғалардан кейін ешқандай басшы жұмысқа қабылдамайды. Жаңа Қазақстанды құруға атсалысқым келеді. Менің күш-қуатым толы, халық үшін қызмет етуге құлшынып тұрмын. Мемлекеттік қызметтегі барлық уақытта арыма дақ түспеді, ар-ұятыммен әрекет еттім», -  деп жазды Қайрат Досаев.
Досаевтың жазуы бойынша, ол мемлекеттік қызметке тек Президент Тоқаев араласқан соң ғана орала алмақ. Соңғы үміті Мемлекет басшысында екенін айтыпты. Еске салсақ, Қайрат Әскербекұлы Досаев – Тараз қаласының бұрынғы әкімі. 2019 жылы күзде мектеп әжетханасында оқушы қыз зорланған соң қызметтен кеткен. Сол уақытта шулы оқиғаны Президент өз бақылауына алып, облыс әкіміне Тараз қаласының әкімі қызметтен кетсін деген тапсырма берген. Сол жылы желтоқсан айында Қайрат Досаев Жамбыл облыстық Еңбек инспекциясы басқармасының басшысы болды. Арада жарты жыл өткен соң Жамбыл облыстық Табиғи ресурстар және табиғат пайдалануды реттеу басқармасының басшысы болып тағайындалған. Артынша мұны біліп қойған Президент Бердібек Сапарбаевқа сөгіс жариялап, Досаевты қызметтен кетсін деді.