قىزمەتىنەن قۋىلعان دوساەۆ پرەزيدەنتكە حات جازدى

تاراز قالاسىنىڭ بۇرىنعى اكىمى قايرات دوساەۆ پرەزيدەنت قاسىم-جومارت توقاەۆقا حات جازىپ، «جاڭا قازاقستاندى» قۇرۋعا اتسالىسقىسى كەلەتىنىن ايتتى دەپ حابارلادى turkystan.kz  7kun.kz سايتىنا سىلتەمە جاساپ.

قايرات دوساەۆ – الماتى اكىمى ەربولات دوساەۆتىڭ تۋعان باۋىرى. ءومىرىمنىڭ 20 جىلىن مەملەكەتتىك قىزمەتكە ارنادىم دەگەن ول ءوزىنىڭ Facebook پاراقشاسى ارقىلى قاسىم-جومارت توقاەۆقا حات جولدادى. حات ورىس تىلىندە. وندا ءوزىنىڭ قىزمەت جولىن، ادال قىزمەت ەتكەنىن، پرەزيدەنتكە الدەكىمدەر جالعان اقپارات جەتكىزگەنىن جازىپتى.

«قازىر مەنى بولعان وقيعالاردان كەيىن ەشقانداي باسشى جۇمىسقا قابىلدامايدى. جاڭا قازاقستاندى قۇرۋعا اتسالىسقىم كەلەدى. مەنىڭ كۇش-قۋاتىم تولى، حالىق ءۇشىن قىزمەت ەتۋگە قۇلشىنىپ تۇرمىن. مەملەكەتتىك قىزمەتتەگى بارلىق ۋاقىتتا ارىما داق تۇسپەدى، ار-ۇياتىممەن ارەكەت ەتتىم»، –  دەپ جازدى قايرات دوساەۆ.

دوساەۆتىڭ جازۋى بويىنشا، ول مەملەكەتتىك قىزمەتكە تەك پرەزيدەنت توقاەۆ ارالاسقان سوڭ عانا ورالا الماق. سوڭعى ءۇمىتى مەملەكەت باسشىسىندا ەكەنىن ايتىپتى.

ەسكە سالساق، قايرات اسكەربەك ۇلى دوساەۆ – تاراز قالاسىنىڭ بۇرىنعى اكىمى. 2019 جىلى كۇزدە مەكتەپ اجەتحاناسىندا وقۋشى قىز زورلانعان سوڭ قىزمەتتەن كەتكەن. سول ۋاقىتتا شۋلى وقيعانى پرەزيدەنت ءوز باقىلاۋىنا الىپ، وبلىس اكىمىنە تاراز قالاسىنىڭ اكىمى قىزمەتتەن كەتسىن دەگەن تاپسىرما بەرگەن. سول جىلى جەلتوقسان ايىندا قايرات دوساەۆ جامبىل وبلىستىق ەڭبەك ينسپەكتسياسى باسقارماسىنىڭ باسشىسى بولدى. ارادا جارتى جىل وتكەن سوڭ جامبىل وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى بولىپ تاعايىندالعان. ارتىنشا مۇنى ءبىلىپ قويعان پرەزيدەنت بەردىبەك ساپارباەۆقا سوگىس جاريالاپ، دوساەۆتى قىزمەتتەن كەتسىن دەدى.

ۇقساس جاڭالىقتار

Back to top button