باقىتگۇل حامەنوۆا مەن اقىلبەك رىسقاليەۆتىڭ ءىسى سوتقا جەتتى

اتىراۋ وبلىستىق سوتى ءباسپاسوز قىزمەتىنىڭ مالىمەتىنشە، اتىراۋ وبلىسى اكىمىنىڭ بۇرىنعى ورىنباسارى باقىتگۇل حامەنوۆا مەن وبلىستىق مادەنيەت باسقارماسىنىڭ باسشىسى اقىلبەك رىسقاليەۆتىڭ ءىسى سوتقا جەتتى دەپ حابارلادى turkystan.kz.

«26 مامىردا اتىراۋ قالاسىنىڭ №2 سوتىنا اتىراۋ وبلىسى اكىمىنىڭ ورىنباسارى باقىتگۇل حامەنوۆا مەن اتىراۋ وبلىسىنىڭ مادەنيەت، تىلدەردى دامىتۋ جانە مۇراعات ءىسى باسقارماسىنىڭ باسشىسى اقىلبەك رىسقاليەۆكە قاتىستى قىلمىستىق ءىس كەلىپ ءتۇستى.

ب. حامەنوۆا مەن ا. رىسقاليەۆقا قر قىلمىستىق كودەكسىنىڭ 366-بابىنىڭ 3-بولىگىنىڭ 2-تارماعى («ءبىر توپ ادامنىڭ الدىن الا ءسوز بايلاسۋ ارقىلى پارا الۋى») بويىنشا ايىپ تاعىلۋدا»، – دەلىنگەن ءباسپاسوز حابارلاماسىندا.

ايتا كەتسەك، 6 مامىردا وبلىس اكىمدىگىنىڭ ءباسپاسوز قىزمەتى حامەنوۆا ءوز ەركىمەن جۇمىستان كەتۋ تۋرالى ارىز جازباعانىن جانە ول ءالى دە اتىراۋ وبلىسى اكىمدىگى اپپاراتىندا ەسەپتە تۇرعانىن حابارلادى.

ەسكە سالساق، باقىتگۇل حامەنوۆا 2021 جىلدىڭ 22 جەلتوقسانىنان بەرى  اتىراۋدا 145 ميلليون تەڭگەگە اباي ەسكەرتكىشىن دايىنداۋ جانە ورناتۋ بويىنشا مەملەكەتتىك ساتىپ الۋ تۋرالى كەلىسىمشارت جاساعانى ءۇشىن جشس باسشىسىنان 4،5 ميلليون تەڭگە پارا الدى دەگەن كۇدىكپەن تەرگەۋ يزولياتورىندا وتىر. ول 10 جەلتوقساندا  ۇستالدى. جاۋاپ الىنعاننان كەيىن ونى ۋاقىتشا ۇستاۋ يزولياتورىنا قامادى.

ونىمەن بىرگە وبلىستىق مادەنيەت باسقارماسىنىڭ باسشىسى اقىلبەك رىسقاليەۆ تە ۇستالدى.

ال 12 جەلتوقساندا اتىراۋ قالاسىنىڭ مامانداندىرىلعان تەرگەۋ سوتى حامەنوۆاعا قاتىستى ۇيقاماققا الۋ تۋرالى سانكتسيا بەردى.

ۇقساس جاڭالىقتار

Back to top button