فۋتبولدان قازاقستان قۇراماسى ءىرى ەسەپپەن جەڭىسكە جەتتى

«استانا ارەنا» ستاديونىندا قازاقستاننىڭ ۇلتتىق جانە جاستار قۇرامالارى وقۋ-جاتتىعۋ جيىنى اياسىندا جولداستىق ماتچ وتكىزدى دەپ حابارلادى turkystan.kz قفف-عا سىلتەمە جاساپ.

كەزدەسۋ 4:1 ەسەبىمەن ۇلتتىق قۇرامانىڭ پايداسىنا اياقتالدى.

العاشقى تايمدا قورعاۋشى الەكساندر ماروچكين قوس گول سوقتى. ويىننىڭ ەكىنشى بولىگى باستالعان ساتتە ماكسيم سامورودوۆ كوزگە ءتۇستى. 51-مينۋتتا جاستاردىڭ قورعاۋشىسى ساعي سوۆەت ەسەپ ايىرماسىن قىسقارتتى. ماتچ سوڭىنا قاراي الەكسەي ششەتكين پەنالتيدەن گول سوقتى.

ويىننان سوڭ ۇلتتىق قۇرامانىڭ باس باپكەرى ماگومەد اديەۆ كوماندا دايىندىعىنىڭ نەگىزگى مىندەتتەرىنە توقتالدى.

«ويىنعا ءۇش تاپسىرما قويىلدى: كەيبىر ويىن ۇلگىلەرى مەن ويىنشىلاردىڭ قۇرامىن بايقاۋ، الداعى ويىنداردا قولدانىلاتىن جاڭا ويىن جۇيەسىن كورۋ جانە ءۇش كۇنگە سوزىلعان ەكى رەتتىك جاتتىعۋدان سوڭ فۋتبولشىلاردىڭ فيزيكالىق جاعدايىن سارالاۋ بولدى. بارلىعىن كورىپ، تالداپ شىقتىق دەپ ويلايمىن. ەندى ۇلتتار ليگاسىنىڭ ويىندارىنا دايىندالامىز. جاستار قۇراماسىمەن وتكەن جولداستىق كەزدەسۋدەن جاتتىقتىرۋشىلار شتابى مول ماعلۇمات الدى دەپ سانايمىن»، – دەدى اديەۆ.

قازاقستان جاستار قۇراماسىنىڭ U-21 اعا جاتتىقتىرۋشىسى قايرات نۇرداۋلەتوۆ تە كەزدەسۋ تۋرالى ويىن ورتاعا سالدى.

«جولداستىق ويىنعا قويعان ءوز ماقساتىمىز بولدى. ۇلتتىق قۇراما وزدەرىنە جەكە ماقساتتار قويدى. ەڭ الدىمەن فۋتبولشىلاردى 4 جانە 10 ماۋسىم كۇندەرى وتەتىن ويىندارعا دايىنداۋ قاجەت. فيزيكالىق جاعىنان جولداستىق ويىننىڭ ماڭىزى زور بولدى. ەكى ورتالىق قورعاۋشىنى ويناتىپ، جاڭا ويىن جۇيەسىن سىناپ كوردىك. العا قويىلعان مىندەتتەر تولىق ورىندالدى دەپ ويلايمىن. جاتتىقتىرۋشىلار شتابىنىڭ كوماندانىڭ ويىنى مەن فۋتبولشىلاردىڭ جىلدامدىعىنا كوڭىلى تولادى. بارلىق مالىمەتتەردى الدىق. ەندى وسى ويىندى تالداپ، ءارى قاراي دايىندالامىز. ۇسىنىسىمىزدى قابىلداپ، كەزدەسۋدى ۇيىمداستىرعان ۇلتتىق قۇرامانىڭ جاتتىقتىرۋشىلار شتابىنا العىس ايتامىن. ولار ءۇشىن دە ويىن پايدالى بولادى دەپ ۇمىتتەنەمىن»، – دەدى قايرات نۇرداۋلەتوۆ.

ۇقساس جاڭالىقتار

Back to top button