مەديتسينا مەكەمەلەرىنىڭ قىزمەتكەرلەرىن بوپسالاعاندار ۇستالدى (ۆيدەو)

تۇركىستان وبلىسى پد كريمينالدىق پوليتسيا باسقارماسى، تۇركىستان وبلىسى بويىنشا ۇقكد قىزمەتكەرلەرى بىرلەسىپ جۇرگىزگەن وپەراتسيانىڭ ناتيجەسىندە قىلمىستىق توپتى ۇستادى دەپ حابارلادى turkystan.kz.

ناقتىراق ايتساق، كۇدىكتىلەر جۇيەلى تۇردە ماقتارال جانە جەتىساي اۋداندارىندا ورنالاسقان مەديتسينا مەكەمەلەرىنىڭ قىزمەتكەرلەرىنەن، ولاردىڭ قارجىلىق قىزمەتى تۋرالى مالىمەتتەرىن تاراتىپ، جالا جاۋىپ، ونى جاريالاۋ قاۋپىن ءتوندىرىپ، اقشا بوپسالاۋمەن اينالىسقان.

بۇل تۋرالى بريفينگتە تۇركىستان وبلىسى پوليتسيا دەپارتامەنتى باستىعىنىڭ ورىنباسارى، پوليتسيا پولكوۆنيگى قۇرمانبەك ساحوۆ ايتىپ بەردى.

«كريمينالدىق پوليتسيا باسقارماسىنا مەديتسينا مەكەمەسىنىڭ ءبىرىنىڭ قىزمەتكەرى شاعىمداندى. ونىڭ ايتۋىنشا، بەلگىسىز بىرەۋلەر جالعان مالىمەتتەردى تاراتىپ جاريالايمىز، سونداي-اق باقىلاۋشى ورگانداردىڭ جوسپاردان تىس تەكسەرۋلەرىن ۇيىمداستىرامىز دەپ بوپسالاپ، 32 ميلليون تەڭگە تالاپ ەتكەن. اتالعان جايت ءبىزدىڭ پوليتسەيلەرمەن بىردەن قر قك-ءنىڭ 194-بابى 4-بولىگى «اسا ءىرى مولشەردەگى بوپسالاۋ» بويىنشا سدتبت-عا تىركەۋگە الىندى»، – دەدى ول.

قىلمىستىق توپتى ۇستاۋ جانە قىلمىستى اشۋ ماقساتىندا، تۇركىستان وبلىسى بويىنشا پد كپب مەن قر ۇقكد قىزمەتكەرلەرىنەن ارنايى توپ قۇرىپ، كەزەك كۇتتىرمەيتىن تەرگەۋ جۇمىستارىن جۇرگىزگەن.

جەدەل-ىزدەستىرۋ ءىس-شارالارى كەزىندە جەتىساي قالاسىنداعى كافەلەردىڭ بىرىندە ءىرى كولەمدە اقشا قاراجاتىن بوپسالاپ، الىپ جاتقان جەتىساي قالاسىنىڭ تۇرعىنى ۇستالدى. سەزىكتىدەن ايعاقتى زات رەتىندە 32 ملن تەڭگە كولەمىندە اقشا تاركىلەندى.

«بۇدان ءارى شىمكەنت قالاسىنداعى مەكەمەلەردىڭ ءبىرىنىڭ جانىنداعى تەرگەۋ ارەكەتتەرىنىڭ ناتيجەسىندە، پد كريمينالدىق پوليتسيا باسقارماسىنىڭ جەدەل ۋاكىلدەرى، ۇقكد قىزمەتكەرلەرى جانە جىلدام قيمىلدايتىن ارنايى جاساق بىرلەسىپ، ەكىنشى كۇدىكتى، ماقتارال اۋدانىنىڭ تۇرعىنىن ۇستادىق. بۇگىندە 2 كۇدىكتى ۋاقىتشا ۇستاۋ يزولياتورىنا قاماۋعا الىندى. قازىرگى ۋاقىتتا ۇستالعاندارعا قاتىستى قاجەتتى جەدەل-تەرگەۋ امالدارى جۇرگىزىلىپ جاتىر» دەپ تۇيىندەدى ءسوزىن پد باستىعىنىڭ ورىنباسارى ق.ساحوۆ.

ۇقساس جاڭالىقتار

Back to top button