اتىراۋدا 14 جاستاعى وقۋشىنى اياۋسىز سوققىعا جىققان (ۆيدەو)

20 مامىر كۇنى اتىراۋ وبلىسىنداعى يساتاي اۋدانى يساتاي اۋىلىندا 8-سىنىپ وقۋشىسى ءتۇرلى دەنە جاراقاتىمەن اۋداندىق اۋرۋحاناعا جەتكىزىلدى دەپ حابارلادى turkystan.kz.

ءجاسوسپىرىمنىڭ اناسى گۇلزادا مۇساعاليۆا وقيعانىڭ 20 مامىر كۇنى كۇندىز بولعانىن، فۋتبول ويناۋعا كەتكەن بالاسى ۇيىنە كوڭىلسىز كەلگەنىن ايتتى.

«وتباسىمىزدا ءۇش بالامىز بار. كەنجە بالام مۇحانبەت فۋتبولدان ءبىرتۇرلى دەنەسىن اۋىرسىنىپ كەلگەندەي بولدى. نە بولدى دەپ سۇراعانىمدا ويناپ ءجۇرىپ، قۇلاپ قالدىم دەدى. سودان سوڭ جاتىپ قالدى. كەيىن تاماققا تۇرعىزعانىمىزدا ورىندىقتا دۇرىس وتىرا المادى، ءبىرتۇرلى دىرىلدەپ وتىرعانداي بولدى. ەرتەسىنە دە بالام سەلسوق، تەك جاتا بەردى. سول كەزدە ۇستىندەگى كوگەرگەن ىزدەردى كورىپ شوشىپ كەتتىم. دەرەۋ «جەدەل جاردەم» مەن پوليتسيانى شاقىرىپ، ارىز ءتۇسىردىم»، – دەدى  گ.مۇساعاليەۆا.

دارىگەرلەر ءجاسوسپىرىمدى اۋداننان وبلىس ورتالىعىنا الىپ كەتكەن. سول جەردە وعان «وڭ جاق يىقتىڭ كوپتەگەن جۇمساق تىندەرىنىڭ كوگەرۋى، بەل جانە جۇرەك قۋىسىنىڭ جاراقاتى» دەگەن دياگنوز قويعان.

« ۇلىمدى 9 بالا ۇرعان. ەكەۋى – 9-سىنىپ وقۋشىسى، قالعاندارى سىنىپتاستارى. قازىر ولاردىڭ اتا-انالارى كەلىپ، كەشىرىم سۇراپ جاتىر. مۇنى جازاسىز قالدىرعىم كەلمەيدى. مەكتەپ تە جاۋاپ بەرسىن»، – دەيدى زارداپ شەككەن بالانىڭ اتا-اناسى.

يساتاي ورتا مەكتەبىنىڭ ديرەكتورى ايگۇل ادىلباەۆا ءىستى پوليتسيا تەكسەرىپ جاتقانىن، تەرگەۋ اياقتالعانشا ەشتەڭە ايتا المايتىنىن جەتكىزگەن.

«وسى وقيعاعا بايلانىستى وقۋشىلارمەن جانە ولاردىڭ اتا-انالارىمەن كەزدەسۋ وتكىزدىك. بالالار بۇل وقيعا ساباق اياقتالعاننان كەيىن، اۋىلدىڭ شەتىندە بولعانىن ايتادى. قازىر جابىرلەنۋشىنىڭ جاعدايى قالىپتى، اۋرۋحانادا ەمدەلىپ جاتىر»، – دەدى يساتاي اۋداندىق ءبىلىم ءبولىمىنىڭ باستىعى گۇلاينا قۇرمانعاليەۆا.

اتىراۋ وبلىستىق پوليتسيا دەپارتامەنتى ءباسپاسوز قىزمەتىنىڭ مالىمەتىنشە، 21 مامىردا 2007 جىلى تۋعان ءجاسوسپىرىمنىڭ اتا-اناسىنان ارىز تۇسكەن. كۇدىكتى رەتىندە يساتاي ورتا مەكتەبىنىڭ ەكى 9-سىنىپ وقۋشىسى انىقتالعان. بۇل وقيعاعا قاتىستى قر قىلمىستىق كودەكسىنىڭ 107-بابى («دەنساۋلىققا قاساقانا اۋىرلىعى ورتاشا زيان كەلتىرۋ») بويىنشا سوتالدى تەرگەۋ باستالىپ، ساراپتامالار تاعايىندالعان.

ۇقساس جاڭالىقتار

Back to top button