1 ميلليوننان استام جۇمىسشىنىڭ جالاقىسى وسەدى

پرەمەر-ءمينيستردىڭ ورىنباسارى ەرالى توعجانوۆ ءبىر ميلليوننان استام جۇمىسشىنىڭ جالاقىسى كوتەرىلەتىنىن مالىمدەدى دەپ حابارلادى turkystan.kz

ۇكىمەت حالىقتىڭ تابىسىن ارتتىرۋ باعدارلاماسى اياسىندا ءبىراز شارالاردى قولعا الدى. نەگىزگى ماقساتتاردىڭ ءبىرى – جۇمىسشىلاردىڭ جالاقىسىن كوتەرۋ.

«1،1 ميلليوننان استام جۇمىسكەردىڭ ەڭبەكاقىسىن ارتتىرۋ كوزدەلگەن. سونىڭ ىشىندە بيۋدجەت سالاسىنىڭ 850 مىڭنان اسا قىزمەتكەرلەرىنىڭ لاۋازىمدىق ايلىق اقىسى ۇلعايتىلادى. ماسەلەن، دارىگەرلەردىڭ جالاقىسى 320 مىڭنان 531 مىڭ تەڭگەگە دەيىن، ورتا مەديتسينا قىزمەتكەرلەرىنىڭ جالاقىسى 173 مىڭنان 250 مىڭعا دەيىن وسەدى. پەداگوگ مامانداردىڭ جالاقىسى دا ارتادى»، – دەدى توعجانوۆ سەناتتىڭ جالپى وتىرىسىندا.

«سامۇرىق-قازىنا» قورىنا قاراستى تاعى ءتورت كومپانيادا جىلدىڭ سوڭىنا دەيىن وندىرىستىك پەرسونالدىڭ ەڭبەكاقىسى 5-18 پروتسەنتكە كوتەرىلەدى.

«بۇدان بولەك، مەملەكەتتەن قولداۋ شارالارىن الاتىن ءىرى بيزنەسكە قاتىستى مىندەتتەمەلەردى بەلگىلەۋ ەسەبىنەن وندا ىستەيتىن 2،8 ميلليون قىزمەتكەردىڭ ورتاشا جالاقىسى وسەدى. اشىعىن ايتۋ كەرەك، ءبىز مۇنداي تالاپتى ءبىرىنشى رەت قويىپ وتىرمىز. بۇگىندە مەملەكەتتىڭ ۇلكەن باعدارلامالارىنا، سونىڭ مەملەكەتتىك ساتىپ الۋلارعا قاتىساتىن كوپتەگەن ءىرى كومپانيا بار. ولارمەن ناقتى كەلىسىم جاسالعان»، – دەدى ۇكىمەت باسشىسىنىڭ ورىنباسارى.

توعجانوۆ وسى ۋاقىتقا دەيىن جۇمىسشىلاردىڭ جالاقىسىن كوتەرگەن ءىرى كومپانيالاردى دا اتاپ ءوتتى. ولاردىڭ ىشىندە KAZ Minerals (15 پروتسەنت)، قازازوت (20 پروتسەنت)، ERG (25 پروتسەنت)، قازاقمىس (30 پروتسەنت) جانە تاعى باسقا كاسىپورىندار بار. جالپى، 150-دەن استام كومپانيا جالاقىنى كوتەرۋگە كەلىستى.

ۇقساس جاڭالىقتار

Back to top button