اقىلى جولداردىڭ باعاسى قىمباتتاي ما؟

الەۋمەتتىك جەلىدە اقىلى جولدار ءتاريفى وسەتىنى جايلى اقپارات تارادى. اقپاراتقا كولىك كوميتەتى مالىمدەمە جاسادى دەپ حابارلادى turkystan.kz.

«Whatsapp جەلىسىندە جۇك كولىكتەرىنىڭ ءجۇرۋ قۇنىن شاقىرىمىنا 400 تەڭگەگە دەيىن قىمباتتاتۋ تۋرالى اقپارات شىندىققا جاناسپايتىنىن ايتا كەتۋ كەرەك. بارىنشا ساق بولىپ، ارانداتۋشىلىققا جول بەرمەۋگە شاقىرامىز. قوسىمشا سۇراقتار تۋىنداعان جاعدايدا 1403 ءنومىرى بويىنشا حابارلاسۋلارىڭىزعا بولادى. ەستەرىڭىزگە سالا كەتەيىك، جالعان اقپارات تاراتقان تۇلعالار قىلمىستىق جاۋاپكەرشىلىككە تارتىلادى»، – دەلىنگەن كوميتەت حابارلاماسىندا.

رەسپۋبليكا بويىنشا ۇزىندىعى 2،2 مىڭ شاقىرىم بولاتىن I ساناتتاعى اۆتوجولداردىڭ 11 اقىلى ۋچاسكەسى جۇمىس ىستەپ تۇر.

اقىلى ۋچاسكەلەردەگى تاريفتەر ۇكىمەتتىڭ 2013 جىلعى قاۋلىسىمەن بەكىتىلگەن:

– جەڭىل كولىك ءۇشىن – شاقىرىمىنا 1 تەڭگە;

– 16 ورىنعا دەيىنگى اۆتوبۋستار جانە 1-دەن 2،5 تونناعا دەيىنگى جۇك كولىكتەرى ءۇشىن – شاقىرىمىنا 5 تەڭگە;

– 32 ورىنعا دەيىنگى اۆتوبۋستار جانە 5،5 تونناعا دەيىنگى جۇك كولىكتەرى ءۇشىن – شاقىرىمىنا 10 تەڭگە;

– 32 ورىننان جوعارى اۆتوبۋستار جانە 10 تونناعا دەيىنگى جۇك كولىكتەرى ءۇشىن – شاقىرىمىنا 15 تەڭگە;

– 10-نان 15 تونناعا دەيىنگى جۇك كولىكتەرى ءۇشىن – شاقىرىمىنا 20 تەڭگە; – 15-تەن 25 تونناعا دەيىنگى جۇك كولىكتەرى ءۇشىن – شاقىرىمىنا 25 تەڭگە.

قازىرگى ۋاقىتتا قولدانىستاعى I ساناتتاعى اقىلى ۋچاسكەلەر بويىنشا جول ءجۇرۋ ءتاريفىن كوتەرۋ كوزدەلمەيدى، ياعني ولار بۇرىنعى قالپىندا قالادى.

تەك شەت ەلدەردىڭ ترانزيت جۇك كولىكتەرى ءۇشىن جول ءجۇرۋ ءتاريفىن ۇلعايتۋ ماسەلەسى قاراستىرىلىپ جاتىر.

قازىرگى ۋاقىتتا باستاما حالىقارالىق زاڭنامانى ەسكەرە وتىرىپ الدىن الا تالقىلانۋ ۇستىندە. بۇل شەشىم جەرگىلىكتى كومپانيالار اراسىندا ادال باسەكە تۋعىزادى.

وسىعان بايلانىستى، اۆتوجولداردىڭ اقىلى ۋچاسكەلەرى بويىنشا ءجۇرۋ ءۇشىن بىرىزدەندىرىلگەن جانە ترانزيتتىك تاريفتەر ازىرلەنىپ جاتىر.

ۇقساس جاڭالىقتار

Back to top button