4 пайызбен автокөлік сатып алуға мүмкіндік беретін бағдарлама келесі аптада басталады. Бұл туралы Үкімет үйінде өткен баспасөз мәслихатында Индустрия және инфрақұрылымдық даму министрі Қайырбек Өскенбаев мәлімдеді деп хабарлады turkystan.kz.
Экология, геология және табиғи ресурстар министрі Серікқали Брекешевтің айтуынша, қазір утилизациялық алым бойынша оператор «Жасыл даму» АҚ-дан жеңілдетілген автонесиеге қаржы бөлу жұмыстары жүріп жатыр.
««Жасыл даму» шотынан ақша аудару бойынша корпоративтік рәсімдер жүргізілуде. Бұл жұмыс аяқталған соң, ақша жіберіледі. Осы аптаның соңына дейін, мамырдың алтысына дейін бітіреміз», - деді Брекешев Үкімет үйінде өткен баспасөз мәслихатында.
Индустрия министрі Қайырбек Өскенбаев тиісті қаражат осы апта түссе, келесі жұмада бағдарлама іске қосылатынын мәлімдеді.
«Аптаның аяғына дейін ақша түссе, келесі аптадан бастап бұл жұмыс басталады», - деді Өскенбаев.
Бағдарламаның негізгі шарттары:
Кредит сомасы – 10 миллион теңге;
Жылдық сыйақысы 4 процент;
Мерзімі – 7 жыл.
Көлік бағасы кредит сомасынан жоғары болса, үстінен ақша қосуға болады.
