Оқушылар ҰБТ-ның тегін сынақ тестілеуінен өте алады

Ұлттық тестілеу орталығының сайты арқылы сынақ тестілеуден онлайн әрі тегін өтуге болады деп жазды turkystan.kz БҒМ баспасөз қызметіне сілтеме жасап. Тестіленуші сынаққа қатысу үшін prob-ent.testcenter.kz сайтында ЖСН-ін енгізіп, бейіндік пәндер комбинациясын таңдай алады. Талапкер сынақ тестілеуінен өту кезінде тест тапсырмаларымен танысып, таңдалған пәндер бойынша өз білім деңгейін тексеруге мүмкіндік алып отыр. Сондай-ақ онлайн сынақ ұлттық біліктілік тестілеуін тапсыратын мұғалімдер үшін де қолжетімді. Педагогтар prob-nqt.testcenter.kz сілтемесі арқылы сынақтан өте алады. Еске сала кетсек, биыл түлектерге ҰБТ-ны екі рет тапсыруға рұқсат берілген. Бұған қоса, биылғы ҰБТ-да ерекше қажеттілігі бар тест тапсырушыларға 40 минут қосылады. Бұдан былай, ҰБТ тапсырушыларға қорытынды балмен бірге тақырыптық талдау қорытындысы берілетін болды.