Қызылорда облысының әкімі кеңесшілерден бас тартты

Қызылорда облысының жаңа әкімі Нұрлыбек Нәлібаев кеңесшілер штатын қысқартып, бірнеше облыстық департаменттерді біріктірді деп хабаралады turkystan.kz.

Облыс әкімдігінің кеңейтілген отырысында өңір басшысы 24 басқарманың 8-і қысқартылып, 16 басқарма облыс әкімдігінің құрылымында қалғанын айтты.

«Өздеріңіз білесіздер, облыста 24 облыстық басқарма бар. Енді оның 8-і қысқартылып, 16 басқарма облыс әкімдігінің құрылымында қалады. Қабылданған шешім функциялардың қайталануын жояды, саланың теңгерімді реттелуін қамтамасыз етеді. Бұл – жұмыстың жалпы көлемін және басқару тобын оңтайландыру арқылы әкімшілік шығындарды қысқарту. Сол сияқты қалалар мен аудандар әкімдіктерінің құрылымын өзгерту қажет», – деді облыстың жаңа әкімі.

Сондай-ақ, ол бұдан былай облыс әкімі аппаратында штаттық және штаттан тыс кеңесшілер лауазымдары болмайтынын мәлімдеді.

«Алдағы уақытта облыс әкімінің штаттық және штаттан тыс кеңесшілері болмайды. Кеңесші атағын оңды-солды таратпау керек. Біздің басты кеңесшіміз – халық!» – деді Нұрлыбек Нәлібаев.

Сонымен қатар, ол облыстың әлеуметтік-экономикалық дамуына талдау жасай отырып, биылғы жылдың бірінші тоқсанында өнеркәсіп өнімінің көлемі 4,2 пайызға төмендеп, соның нәтижесінде 3 ауданның бірі республикадағы соңғы орындарда тұрғанын атап өтті. Бірқатар макроэкономикалық көрсеткіштер бойынша төмен деректер Қазалы, Шиелі және Арал аудандарында байқалды.

«Осы үш ауданның әкіміне сөгіс жарияланды», – деді жаңа әкім.

Ұқсас жаңалықтар

Back to top button