Енді жеке куәлік берілгенде саусақ ізі алынатын болады

Бұл жаңашылдық 2023 жылдан бастап енгізілмек. Бұл туралы Нұр-Сұлтан қаласы Полиция департаменті Көші-қон қызметі басқармасының басшысы Арман Баймұхамет айтты деп хабарлады turkystan.kz.

Басқарма басшысының айтуынша, алдағы жылы елорда тұрғындарына жеке құжат берілген сәтте саусақ ізі алынады.

«2023 жылдан бастап жеке басын куәландыратын құжаттарды алған немесе ауыстырған кезде саусақ ізін енгізуді жүзеге асыру жоспарланған. Қазір аталған жаңашылдық Сарыарқа аудандық Халыққа қызмет көрсету орталығында пилоттық режимде жүзеге асып жатыр. Бұл заңсыз құжат қаупін төмендетеді», – дейді Арман Баймұхамет.

Сонымен қатар спикер жеке басын куәландыратын құжатты беру механизмі жетілдірілгенін атап өтті.

«Биыл 3 айдың ішінде 48 мың 744 төлқұжат пен жеке куәлік берілді. Құжаттарды дайындауға кететін уақыт та қысқарды. Яғни, жалпы тәртіпке сәйкес 20 жұмыс күні ішінде, ал жеделдетілген тәртіпте 1 және 3 жұмыс күнінде құжат дайын болады», – деді ол.

Ұқсас жаңалықтар

Back to top button