Ұлттық экономика министрі Әлібек Қуантыров биыл зейнетақы мен кейбір жәрдемақы түрлері тағы 9 пайызға индексацияланатынын мәлімдеді деп хабарлады turkystan.kz.
Үкімет кулуарында журналистер министрден нақты қандай жәрдемақы түрлері индексацияланатынын сұрады.
«Негізінен бұл - зейнетақы мен кейбір жәрдемақылар. Шамамен 9 пайызға индексацияланады», – деп жауап берді Қуантыров.
Сондай-ақ ол индексация қашан жасалатынын да нақтылады.
«Бюжет нақтыланып, Мәжіліс пен Сенаттың қарауынан өтеді. Кейін Президент «Республикалық бюджет туралы» заңға қол қояды. Одан кейін оны іске асыру жайлы қаулы қабылданады», – деді ол.
Министрдің айтуынша, зейнетақы мен жәрдемақы шамамен маусым-шілде айларында өседі.
Бұған дейін Үкімет 2022 жылға арналған макроэкономикалық көрсеткіштер мен бюджеттік параметрлер болжамын нақтылады. Оған сәйкес, инфляция дәлізі 8-10%-ға дейін көтерілді.
Инфляция дәлізінің өзгеруіне байланысты әлеуметтік төлемдерді индекстеуге қосымша 110 миллиард теңге бөлінеді.
