ۋيلل سميت «وسكار» سىيلىعى راسىمىندەگى قولايسىز ارەكەتى ءۇشىن كەشىرىم سۇرادى

لوس-اندجەلەستەگى دولبي تەاترىندا 94-ءشى «وسكار» سىيلىعىن تابىستاۋ راسىمىندە اكتەر ۋيلل سميت كوپشىلىك الدىندا كريس روكقا قول كوتەردى. كەيىن اكتەر ءوز ارەكەتى ءۇشىن كوپشىلىكتەن كەشىرىم سۇرادى دەپ حابارلادى turkystan.kz.

ايتا كەتسەك، ماراپاتتاۋ كەزىندە اكتەر ءراسىمنىڭ جۇرگىزۋشىسى كريس روكتى ايەلى دجاد پينكەتت-سميت تۋرالى ايتقان ءازىلى ءۇشىن شاپالاقپەن تارتىپ جىبەرگەن ەدى. ول كريس روكتىڭ دەرتكە شالدىققان ايەلىنىڭ شاش ۇلگىسىنە قاتىستى ازىلدەگەنىنە نارازىلىعىن وسىلايشا بىلدىرگەن.

سميت ءوزىنىڭ Instagram-داعى پاراقشاسىندا سول ارەكەتى ءۇشىن كەشىرىم سۇرادى.

«زورلىق-زومبىلىقتىڭ كەز كەلگەن ءتۇرى زياندى. وتكەن تۇندە ماراپات كەزىندەگى مەنىڭ ارەكەتىم قولايسىز جانە كەشىرىلمەيدى. ماعان قاتىستى ايتىلاتىن ءازىل – جۇمىسىمنىڭ ءبىر بولىگى دەپ قابىلدايمىن. بىراق دجادانىڭ دەنساۋلىعىنا قاتىستى ءازىل مەن ءۇشىن اۋىر بولدى. سوندىقتان مەن وعان ەموتسيونالدى تۇردە جاۋاپ بەردىم. كريس، سىزدەن كوپشىلىك الدىندا كەشىرىم سۇراعىم كەلەدى. مەن قاتەلەستىم. ول ءۇشىن ۇيالامىن جانە مەنىڭ بۇل ارەكەتىم ءوز بولمىسىم ەمەس. ماحاببات پەن مەيىرىمدىلىك الەمىندە زورلىق-زومبىلىققا ورىن جوق» دەپ جازدى ول.

تاعى وقي وتىرىڭىز: ۋيلل سميت «وسكار» سىيلىعى راسىمىندە ارىپتەسىنە قول كوتەردى (ۆيدەو)

سونىمەن قاتار اكتەر امەريكالىق كينو اكادەمياسىنان، شوۋ ۇيىمداستىرۋشىلارىنان جانە بارلىق قاتىسۋشىلاردان، سونداي-اق بۇكىل الەمدەگى كورەرمەندەردەن كەشىرىم سۇرادى.

ۇقساس جاڭالىقتار

Back to top button