قاسىم حان تۋرالى كينوفيلم پروكاتكا جول تارتادى

جۋىردا قاسىم حاننىڭ تاريحتا ءجۇرىپ وتكەن جولى، بەينەسى، ۇلىلىعى جايىندا سىر شەرتەتىن « ۇلى دالا تاڭى» ءفيلمى جارىق كورەدى دەپ جازدى turkystan.kz تۋىندىنىڭ ءباسپاسوز قىزمەتىنە سىلتەمە جاساپ.

اتالمىش كارتينانى مادەنيەت جانە سپورت مينيسترلىگىنىڭ تاپسىرىسى بويىنشا شاكەن ايمانوۆ اتىنداعى «قازاقفيلم» اق ءتۇسىردى.

«وڭاي بولعان جوق. الايدا، مەن جانە ءبىزدىڭ كوماندا اتقارعان جۇمىسىمىزبەن جانە كوپ كۇتتىرگەن ناتيجەمىزبەن ماقتانامىز»، – دەپ جازدى رەجيسسەر اقان ساتاەۆ ءوزىنىڭ الەۋمەتتىك جەلى پاراقشاسىندا.

فيلم وقيعالارى XV عاسىردىڭ 70-جىلدارىنان XVI عاسىردىڭ 20-جىلدارىنا دەيىنگى ارالىقتى قامتيدى. اتاپ ايتساق، قازاق حالقىنىڭ تاريحىنداعى قاسىم حاننىڭ بيلىك قۇرعان كەزەڭى مەن مەملەكەت وركەندەپ، شىعىس دەشتى-قىپشاقتىڭ كەڭ اۋماعىنا باقىلاۋ ورناتىلعانى تۋرالى باياندالادى. ءدال وسى جىلدارى قازاقتار دەربەس ەتنيكالىق قاۋىمداستىق رەتىندە ءبىزدىڭ اۋماقتان تىس جەرلەرگە دە بەلگىلى بولدى. 1510 جىلى ۇلىتاۋ شايقاسىندا قاسىم حان جەڭىسكە جەتكەن سوڭ ونىڭ ۇلىلىعى، اتاق-ابىرويى كۇللى دەشتى قىپشاققا تاراعان. قاسىم حاننىڭ تۇسىندا قازاق اسكەرىنىڭ سانى ءبىر دەرەكتە – 400 مىڭ، تاعى بىرىندە 300 مىڭ دەلىنسە، حالىق سانى 1 ميلليونعا جەتتى.

فيلمدەگى باستى ءرولدى  بەرىك ايتجانوۆ (ەرەسەك قاسىم حان)، دانيار ورازاەۆ (جاس قاسىم حان)، ايدوس ابدىقادىروۆ (جاس بۇرىندىق حان)، ەرىك جولجاقسىنوۆ (ەرەسەك بۇرىندىق حان)، نۇرلان ءالىمجانوۆ (مۇحاممەد شايباني)، التىناي نوگەربەك (جاس جاحان بەگىم)، شامشاگۇل مەڭدياروۆا (قارت جاحان بەگىم)، تۇڭعىشباي جامانقۇلوۆ (ەرەسەك ءالي راشيد)، قۋانىش قۇدايبەرگەن (جاس ءالي راشيد) جانە ت.ب. سومدادى.

قازاق حاندىعى تاريحىندا قاسىم حاننىڭ الار ءرولى وراسان زور ەكەنى ءمالىم. ويتكەنى، بيلىك ەتكەن سول ءبىر جىلدارى قازاقستان اۋماعىن باتىستا ەدىلگە دەيىن، شىعىستا ەرتىسكە دەيىن، وڭتۇستىكتە سىردارياعا دەيىن، سولتۇستىكتە توبىلعا دەيىن جەتكىزىپ عانا قويماي، ءومىرىنىڭ سوڭعى جىلدارىندا «قاسىم حاننىڭ قاسقا جولى» اتتى جاڭا زاڭدار جيناعى ەنگىزىلگەن. وسى ورايدا، كوركەم فيلمدە جيناقتىڭ جەكەلەگەن باپتارىمەن قاتار،  ونىڭ ادامگەرشىلىگى، قولباسشىلىعى، بيلىكتى باسقارۋداعى ەرەكشە قاسيەتتەرى ايقىن كورىنىس تاپقان.

ۇقساس جاڭالىقتار

Back to top button