Қазақстанның ең таза, ең лас қаласын білесіз бе?

 OLX сервисі жүргізген зерттеу нәтижесінде Қазақстанның ең таза және ең лас қалалары анықталды. «Мінсіз қала» жобасы аясында қазақстандықтар арасында ең таза қаланы анықтау мақсатында сауалнама жүргізілді. Тұрғындар қаладағы тазалыққа 1-ден 7-ге дейінгі шкала бойынша баға берді. Зерттеуде көшелердегі тазалық пен тәртіп, ауаның тазалығы және коммуналдық қызметтер назарға алынды. Бұл жолғы зерттеудің өзгелерден бір айырмашылығы – рейтингте сарапшылардың емес, қала тұрғындарының пікірі ескерілген. Сауалнамаға сәйкес, еліміздің ең ірі 20 шаһарының ішінде Қостанай ең таза қала атанды. Жалпы рейтингте ол 21 балдың 13,8-ін жинаған. Әсіресе, қостанайлықтардың ауаның тазалығына көңілі толады екен. Коммуналдық қызметтердің жұмысын 3,7 балға бағалаған. Тазалық жағынан екінші орында – Орал қаласы. Жалпы ұпайы – 13,7. Үштікке 13,6 балмен Талдықорған қаласы енді. Ал еліміздің бас қаласы – Астана үздік бестікке де кіре алмады. Елордамыз Көкшетаумен бірге алтыншы орында тұр. Қос қалада 13,1 балдан бар. Ал 4 және 5 орындарда – Шымкент (13,5) пен Петропавл (13,3). Ең таза 10 қаланың ішіне Тараз (12,6), Ақтау (11,9), Павлодар (11,7) және Рудный (11,6 балл) кірген. Тазалықтың жалпы рейтингінде ең төмен балл жинаған қалалар қатарында Семей (9,5) мен Теміртау (7,5) бар. Қарағанды мен Өскемен де (екеуінде де –9,6 балдан) өзгелермен салыстырғанда, лас болып шықты. Алматы қаласы тіпті, ондыққа да кіре алмады.