«سولتۇستىك كورەيا يادرولىق پوليگونىن قالپىنا كەلتىرۋدە» – باق

وڭتۇستىك كورەيانىڭ بۇقارالىق اقپارات قۇرالدارى كحدر-دىڭ پۋنگي-ري يادرولىق پوليگونىن قالپىنا كەلتىرۋى مۇمكىن ەكەندىگىن جارىسا جازۋدا دەپ حابارلادى turkystan.kz Reuters اگەنتتىگىنە سىلتەمە جاساپ.

اگەنتتىك مالىمەتىنشە، يادرولىق سىناقتار ورتالىعى 2018 جىلى جابىلعان بولاتىن. بىراق سپۋتنيكتەن تۇسىرىلگەن سۋرەتتەردە بۇل نىساندا جاڭا قۇرىلىس بەلگىلەرى بايقالعان. بۇل تۋرالى دجەيمس مارتين اتىنداعى كاليفورنيالىق يادرولىق قارۋدى تاراتپاۋدى زەرتتەۋ ورتالىعىنىڭ (CNS) ماماندارى ءوز بايانداماسىندا مالىمدەدى.

«كوممەرتسيالىق سپۋتنيك تۇسىرىلىمدەرى پۋنگي-ري ۋچاسكەسىندە بەلسەندىلىك بەلگىلەرىن كورسەتتى. فوتولاردان جاڭا عيماراتتىڭ قۇرىلىسى مەن جوندەۋ جۇمىستارى جۇرگىزىلىپ جاتقانىن كورۋگە بولادى. تۋننەلدەردىڭ ءبىر بولىگىن قالپىنا كەلتىرۋ بويىنشا جۇمىستار جۇرگىزىلۋدە»، – دەلىنگەن حابارلامادا.

پۋنگي-ري يادرولىق پوليگونى ەلدىڭ قيىر سولتۇستىك-شىعىسىنداعى تاۋلى ايماقتا، قىتايمەن شەكارادان 100 شاقىرىمداي جەردە ورنالاسقان. سولتۇستىك كورەيا بارلىق يادرولىق سىناعىن وسى الاڭدا وتكىزگەن (2006، 2009، 2013، 2016 جانە 2017 جىل). سىناق تاۋ استىندا تەرەڭ قازىلعان تۋننەلدەردە جۇرگىزىلگەن ەدى. سولتۇستىك كورەيا 2018 جىلى وسى تۋننەلدىڭ ءۇش كىرەبەرىسىن جارىلعىش زاتپەن جارىپ، جاۋىپ تاستاعان بولاتىن.

ايتا كەتسەك، بۇعان دەيىن سولتۇستىك كورەيا اقش-پەن تەكەتىرەس جاعدايىندا يادرولىق جانە زىمىران سىناقتارىن قايتا باستاۋى مۇمكىن ەكەنى حابارلانعان بولاتىن.

ۇقساس جاڭالىقتار

Back to top button