ستۋدەنتتەرگە ستيپەنديا تولەۋ ءتاسىلى وزگەرەدى

بۇگىن پارلامەنت ءماجىلىسىنىڭ جالپى وتىرىسىندا، ەكىنشى وقىلىمدا ماڭىزدى نورمالاردى كوزدەيتىن زاڭ جوباسى قابىلداندى. بۇل تۋرالى ءبىلىم جانە عىلىم ءمينيسترى اسحات ايماعامبەتوۆ مالىمدەدى دەپ حابارلادى turkystan.kz.

نەگىزگىلەرى:

1. حالىقارالىق پاندىك وليمپيادالاردىڭ، سونداي-اق حالىقارالىق ورىنداۋشىلار كونكۋرستارى مەن سپورتتىق جارىستاردىڭ جەڭىمپازدارى مەن جۇلدەگەرلەرىنە جوعارى وقۋ ورىندارىندا تەگىن ءبىلىم الۋعا گرانتتار بەرۋ. حالىقارالىق وليمپيادالاردىڭ جەڭىمپازدارى مەن جۇلدەگەرلەرى جانە ولاردىڭ تالىمگەرلەرى ءۇشىن بىرجولعى اقشالاي تولەمدەر كوزدەلەدى. ەستەرىڭىزگە سالا كەتەيىن، پرەزيدەنت ءوز جولداۋىندا وسى تاپسىرمانى بەرگەن بولاتىن.

2. جوعارى ءبىلىم بەرۋدە جاڭا ونلاين وقىتۋ فورماسى ەنگىزىلەدى. ەندى جوو-لار وقىتۋدىڭ ونلاين تۇرىندە بەلگىلى ءبىر وقىتۋ باعىتتارى بويىنشا كادرلاردى دايىنداي الادى. بۇل – زامان تالابى. بۇل رەتتە بىلىكتىلىك تالاپتارىنا سايكەس وقىتۋدىڭ بەلگىلى ءبىر باعىتى بويىنشا (پروكتورينگ، اقپاراتتىق جۇيە، تسيفرلىق كونتەنت، كادرلار جانە ت.ب.) جەكە ليتسەنزيا الۋ مىندەتتى بولادى.

3. قازاقستان تاريحى مەن دۇنيەجۇزى تاريحى وقۋلىقتارى ەندى ەلىمىزدىڭ بارلىق مەكتەبى ءۇشىن بىرىڭعاي جانە بازالىق بولادى. ياعني، ءبىر وقۋ باعدارلاماسى جانە ءبىر نەگىزگى وقۋلىق. سونىمەن بىرگە 2016 جىلعا دەيىن بولعانداي، باسقا پاندەر بويىنشا وقۋلىقتاردىڭ بالاما نۇسقالارى بولادى.

4. ەندى ستيپەنديالار ستۋدەنتتەردىڭ شوتتارىنا تىكەلەي تولەنەدى دەپ جوسپارلانىپ وتىر. ياعني، وسىعان دەيىنگى جوو-عا اۋداراتىن جۇيە بولمايدى. سونىمەن قاتار، ءبىز ۋادە بەرگەنىمىزدەي، جوعارى وقۋ ورىندارىنىڭ گرانتتارى ءۇشىن قارجىلاندىرۋ دا ستۋدەنتتەرگە تىكەلەي جولداما رەتىندە بەرىلەدى. ال كەيىن قارجىنى ستۋدەنتتەردىڭ وزدەرى جوعارى وقۋ ورىندارىنا تولەيدى.

5. جوعارى ءبىلىم دەڭگەيى بويىنشا جاڭادان بەرىلەتىن ليتسەنزيالار ءۇشىن 5 جىل مەرزىم بەلگىلەنەدى. وسىعان دەيىن ولاردىڭ ناقتى مەرزىمى كورسەتىلمەگەن ەدى. ماسەلەن، 1992 جىلى الىنعان ليتسەنزيا بارلىق وزگەرىس پەن جاڭا شارتتارعا قاراماستان جارامدىق كۇشىن ساقتاپ كەلدى. بۇگىنگە دەيىن مەملەكەت ليتسەنزيا مەرزىمىنە قاتىستى تالاپ قويعان جوق.

6. جابىلعان جوعارى وقۋ ورىندارىنىڭ ستۋدەنتتەرىن جانە ولاردىڭ جەكە ىستەرىن باسقا جوعارى وقۋ ورىندارىنا اۋىستىرۋ، وقۋىن اياقتاماعان نەمەسە قورىتىندى اتتەستاتتاۋدان وتپەگەن تۇلعالاردىڭ جەكە ىستەرىن، سونداي-اق وسىعان دەيىن ءبىلىم بەرۋ ۇيىمىندا وقۋدى اياقتاعان تۇلعالاردىڭ جەكە ىستەرى مەن ءبىلىمى تۋرالى قۇجاتتارىنىڭ كوشىرمەلەرىن مەملەكەتتىك مۇراعاتقا ۋاقتىلى تاپسىرۋ ءۇشىن جاۋاپكەرشىلىك ەنگىزىلەدى.

7. كوللەدجدەرگە اكادەميالىق ەركىندىك بەرىلەدى. بىرنەشە جىل بۇرىن ءبىز بۇل رەفورمانى جوعارى ءبىلىم دەڭگەيىندە جۇرگىزدىك. ەندى كوللەدجدەردىڭ ءبىلىم بەرۋ باعدارلامالارى جبپ پاندەرىنىڭ تسيكلىن قوسپاعاندا، مينيسترلىك بەكىتكەن تيپتىك جوسپارلار مەن باعدارلامالار ەمەس، كاسىپتىك ستاندارتتار مەن جۇمىس بەرۋشىلەردىڭ تالاپتارى نەگىزىندە قۇرىلادى.

8. مۇعالىمدەردىڭ مىندەتتى بىلىكتىلىك ارتتىرۋ كۋرستارىنان ءوتۋ مەرزىمى وزگەرىپ جاتىر. قازىر 5 جىلدا 1 رەت، 3 جىلدا كەمىندە 1 رەت ءوتۋ ۇسىنىلادى. بۇگىندە ءبارى جىلدام وزگەرەدى، سوندىقتان مۇعالىمدەردىڭ دە ءوز بىلىكتىلىكتەرىن ءجيى ارتتىرعانى ابزال.

تاعى وقي وتىرىڭىز:مەملەكەتتىك قىزمەت ىستەرى اگەنتتىگىنىڭ اپپارات باسشىسى تاعايىندالدى

ۇقساس جاڭالىقتار

Back to top button