قاسىرەتتى قاڭتارعا جاۋاپتى ورگان باسشىلارى ماجىلىسكە شاقىرتىلادى

قۇقىق قورعاۋ ورگاندارىنىڭ باسشىلارى قاڭتار وقيعاسىنىڭ تەرگەۋ بارىسىن تالقىلاۋ ءۇشىن پارلامەنت ماجىلىسىنە شاقىرتىلاتىن بولدى دەپ جازدى turkystan.kz.

دەپۋتات جاناربەك ءاشىمجان باس پروكۋرور بەرىك اسىلوۆقا جولداعان ساۋالىندا قاسىرەتتى قاڭتار وقيعاسى بويىنشا تەرگەۋدىڭ قاي ساتىدا ەكەنىن سۇراعان.

«ارينە، دەپۋتات رەتىندە قىلمىستىق ىستەرگە ارالاسۋعا، قانداي دا ءبىر باعا بەرۋگە قۇقىعىمىز جوق. سوعان قاراماستان، ءبىزدىڭ مىندەتىمىز – ءتيىستى مەملەكەتتىك قۇرىلىمدارعا سايلاۋشىلاردىڭ تىلەگى مەن تالابىن جەتكىزۋ. رەسمي اقپارات بولماعان سوڭ بولجامدار مەن ءتۇرلى قاۋەسەتتەر تارايدى. ال مۇنى ءوز پايداسىنا پايدالاناتىن ىشكى جانە سىرتقى كۇشتەر بار. تەرگەۋ ادەتتەگىدەي ءجۇرىپ جاتقانىن تۇسىنەمىز، بەلگىلى ءبىر پروتسەدۋرالار بار. بىراق بۇل رەتتە باستاپقى دەرەككوزدەن اقپارات الۋعا مۇمكىندىك جوق»، – دەدى ءماجىلىس دەپۋتاتى.

دەپۋتات قاڭتار وقيعاسى بويىنشا تەرگەۋ جۇمىستارى قاشان اياقتالاتىنىن جانە تەرگەۋ تارتىپسىزدىكتەردى ۇيىمداستىرۋشىلار مەن ارانداتۋشىلاردى قاشان اتاۋدى جوسپارلاپ وتىرعانىن سۇرادى. سەبەبى، بۇل – قوعام تاراپىنان قويىلعان سۇراقتار. بۇل سۇراقتارعا اشىق، انىق، جان-جاقتى جاۋاپتار بەرىلۋى ءتيىس. سوندىقتان ءتيىستى قۇقىق قورعاۋ ورگاندارى، مەملەكەتتىك ورگانداردىڭ باسشىلارى ماجىلىسكە بارىپ، جاۋاپ بەرۋلەرى كەرەك.

جاپپاي تارتىپسىزدىكتەردى تەكسەرۋگە ەكى ايدان الدەقايدا كوپ ۋاقىت كەتكەنىن ايتقان پالاتا سپيكەرى ەرلان قوشانوۆ دەپۋتاتتىڭ بۇل تالابىن قولدادى.

«ءبىز تەرگەۋ بارىسىنا، اسىرەسە قۇپيا ىستەر بويىنشا ارالاسا المايمىز. ارينە، بەلگىلى ءبىر كونستيتۋتسيالىق شەكتەۋلەر بار. بىراق سونىمەن بىرگە، قوعام قاڭتار وقيعاسىنا قاتىستى سۇراقتارعا جاۋاپ كۇتۋدە. ارينە، قۇقىق قورعاۋ ورگاندارى باسشىلارىنىڭ اقپاراتىن تىڭداۋ دۇرىس بولار ەدى. ءبىزدىڭ زاڭنامادا مەملەكەتتىك ورگان باسشىلارىنىڭ جالپى وتىرىستا دەپۋتاتتىق ساۋالعا اۋىزشا جاۋاپ بەرۋ مۇمكىندىگى قاراستىرىلعان. سوندىقتان اپپارات باسشىسى مەن ءتيىستى كوميتەتكە وسىنى ۇيىمداستىرۋدى تاپسىرامىن»، – دەدى ەرلان قوشانوۆ.

ۇقساس جاڭالىقتار

Back to top button