ەلوردادا گۇلمارال تاتىباەۆانىڭ «ويتولعاۋ» اتتى جەكە كورمەسى اشىلدى

نۇر-سۇلتان قالاسىنداعى ەلباسى كىتاپحاناسىنىڭ كوركەمسۋرەت گالەرەياسىندا قازاقستاندىق سۋرەتشى گۇلمارال تاتىباەۆانىڭ «ويتولعاۋ» اتتى جەكە كورمەسىنىڭ اشىلۋى ءوتتى. كورمە «تاۋەلسىزدىكتىڭ مادەني كودى» جوباسىن جۇزەگە اسىرۋ اياسىندا ۇيىمداستىرىلدى دەپ جازدى turkystan.kz.

گۇلمارال تاتىباەۆا – ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ تۇلەگى، سۋرەتشىلەر وداعىنىڭ، ەۋرازيا ديزاينەرلەر وداعىنىڭ جانە ەۋرازيا شىعارماشىلىق گيلدياسىنىڭ مۇشەسى. بۇگىندە اۆتوردىڭ جۇمىستارى قازاقستان، تۇركيا، گوللانديا، كورەيا، لاتۆيا، رەسەي، يوردانيا، ۇلىبريتانيا، قىتاي جانە باسقا ەلدەردىڭ مۋزەيلەرى مەن جەكە كوللەكتسيالارىندا ساقتاۋلى.

ەلوردادا گۇلمارال تاتىباەۆانىڭ «ويتولعاۋ» اتتى جەكە كورمەسى اشىلدى

«گۇلمارال تاتىباەۆا ەڭبەكتەرىنىڭ باسىم بولىگى كوشپەندىلەر وركەنيەتىنىڭ مۇراسى رەتىندە قازاقستاننىڭ تاريحىن، سالت-ءداستۇرىن، مادەنيەتىن سۋرەتتەيدى. الاپات اشارشىلىقتان، توتاليتارلىق رەجيمنەن، توڭكەرىستەر مەن سوعىستاردان امان قالعان قازاق حالقىنىڭ قاسىرەتىنە ۇڭىلگەن اۆتور زۇلماتتى ەسكە ءتۇسىرىپ قانا قويماي، تاۋەلسىزدىك ءۇشىن اتا-بابالارىمىزدىڭ الدىنداعى جاۋاپكەرشىلىكتى ۇمىتپاۋعا شاقىرادى»، – دەدى ەلباسى كىتاپحاناسىنىڭ ديرەكتورى باقىتجان تەمىربولات.

سۋرەتشى شىعارماشىلىعىنىڭ جەكە باعىتىن قالىپتاستىرعان العاشقى ماڭىزدى تاقىرىپتاردىڭ ءبىرى – «اسكەري كوممۋنيزم» ساياساتى، ۇجىمداستىرۋ سالدارىنان بولعان 1919-1922 جانە 1930-1932 جىلدارداعى جاپپاي اشارشىلىقتىڭ قاسىرەتتى كەزەڭى بولاتىن. سول قايعىلى جىلدارداعى وقيعالار اۆتوردىڭ ويتولعاۋىن قالىپتاستىرىپ، جۇمىستارىندا تاۋەلسىز قازاقستاننىڭ جارقىن بولاشاعىنا جاۋاپتى ەكەندىگىن كورسەتە بىلگەن. كەيىن گۇلمارال حالىقتىڭ تاريحىنا، مادەنيەتى مەن رۋحاني قۇندىلىقتارىنا، انا مەن بالا الەمىنە، وتباسى ينستيتۋتىنا نازار اۋداردى.

ەلوردادا گۇلمارال تاتىباەۆانىڭ «ويتولعاۋ» اتتى جەكە كورمەسى اشىلدى

«بۇگىنگى كورمە مەن ءۇشىن وتە ماڭىزدى. ول 2002 جىلدان باستاپ جارىق كورگەن 90-نان استام جۇمىسىمدى قامتيدى. سۋرەتتەردىڭ باسىم بولىگى 5 جىلدان ارتىق ۋاقىت بويى سالىنعان. ولاردىڭ اراسىندا قاپشىققا، قايىن قابىعىنا بەينەلەلەنگەن تۋىندىلار دا بار. بۇل جۇمىستاردىڭ ارقاسىندا مەن حالقىمىزدىڭ تاريحى مەن مادەنيەتىن سۋرەتتەۋگە تىرىستىم. ماسەلەن، قول ۇستاسقانداي بىرىنەن سوڭ ءبىرى تىزىلگەن شاپاندار ارقىلى مەن قازاق ەلىنىڭ بىرلىگى مەن قوناقجايلىلىعىن جەتكىزبەك بولدىم. بايقاساڭىزدار، كورمەدە ۇلتتىق ناقىش كوپ. ولاردى قالىڭ جۇرتتىڭ نازارىنا ۇسىنۋعا كومەكتەسىپ، كورمەنى ۇيىمداستىرۋعا اتسالىسقان ەلباسى كىتاپحاناسىنىڭ باسشىلىعى مەن ۇجىمىنا العىسىم شەكسىز»، – دەپ وي ءبولىستى سۋرەتشىنىڭ ءوزى.

«ويتولعاۋ» كورمەسى ەلباسى كىتاپحاناسىنىڭ 1-2 قاباتتا ورنالاسقان كوركەمسۋرەت گالەرەياسىندا 9 ناۋرىزعا دەيىن جالعاسادى. سونداي-اق كورمە ماتەريالدارىن www.elbasylibrary.gov.kz سايتىنداعى «كورمەلەر» ءبولىمى ارقىلى دا تاماشالاۋعا بولادى.

ۇقساس جاڭالىقتار

Back to top button