Депутаттар «Қошқар ата» улы көлінің зардабын тартып отырған жұртпен жүздесті

Депутаттар «Қошқар ата» улы көлінің зардабын тартып отырған жұртпен жүздесті

Депутаттар «Қошқар ата» улы көлінің зардабын тартып отырған жұртпен жүздесті
ашық дереккөзі
Мәжіліс депутаттары Еділ Жаңбыршин мен Самат Мусабаев аймақтарға сапар барысында Маңғыстау облысына барды. Онда депутаттар экологиялық кеңес мүшелерімен бірге Мұнайлы ауданындағы «Қошқар ата» ойпатында радиоактивті қалдықтар қоймасын залалсыздандыруға қатысты мәселелерді талқылады деп хабарлады turkystan.kz. Мұнайлы ауданы аумағындағы «Қошқар Ата» көлі Каспий теңізіне 7-8 шақырым жерде орналасқан. Ал Ақтау қаласынан 3-4 шақырым қашықтықта жатыр. Бұл көл қалдықтар қоймасының жалпы ауданы 77 шаршы шақырым болса, қалдықтардың ауданы 66 шаршы шақырым шамасында. Тұрғындардың айтуынша, Маңғыстау облысының бүгінгі экологиялық ахуалы әбден ушыққан. Оған «Қошқар ата» улы көлі де жеткілікті. Онсыз да қуаңшылықтан жиі зардап шегіп, су тапшылығын көретін аймақ улы көлдің де зардабын қоса тартып отыр. Қазір маңғыстаулықтар арасында онкологиялық, өкпе және жүрек-қан тамырлары аурулары, йод тапшылығы сияқты ауру түрлері көп. Денсаулығы жарамсыз ана мен одан туатын дімкәс бала саны да аз емес. Маңғыстау
«Бұл экологиялық аймақта 400 мыңға жуық адам тұрады. Тұрғындардың денсаулығы үшін тазарту жұмыстарын жүргізу аса маңызды. Бүгінде улы көлдің 266 гектары залалсыздандырылған. Уақытында рекультивикациялау жұмыстарын аяқтап, сексеуіл егу жоспарда бар», -дейді Мәжіліс депутаты Еділ Жаңбыршин.
«Nur Otan» партиясы Маңғыстау облыстық филиалының ақпаратына сүйенсек, депутаттар аймақта жасалған жұмыстардың сапасына мән беріп, алдағы жұмыс барысын тыңдаған. Істің мән-жайын баяндаған мердігер мекеме басшысының айтуынша, өткен жылы бөлінген 1 млрд қаржы игеріліп, 266 гектар жер залалсыздандырылды. Биыл бөлінген 3 млрд теңгеге 800-900 гектар аймақты рекультивациялау жоспарлануда. Жұмысты жүргізуге 40-қа жуық техника жұмылдырылып, 70-тен астам адам жұмыспен қамтылған. Маңғыстау облысынан сайланған Мәжіліс депутаттары өңірдегі мәселеге алаңдаулы екенін айтып, оны назарға алатындарын жеткізді.