«ءبارىڭدى دە جەك كورەمىن»: بەيجىڭدە التىنسىز قالعان سپورتشى قىز شۋ شىعاردى (ۆيدەو)

بەيجىڭ وليمپياداسىندا مانەرلەپ سىرعاناۋدان ايەلدەر اراسىنداعى جەكەلەي سىن اياقتالدى. رەسەيلىك الەكساندرا ترۋسوۆا وتانداسى اننا ششەرباكوۆاعا جول بەرىپ، كۇمىس مەدال يەلەندى. بىراق بۇل جۇلدەسىنە قاناعاتتانباعان جاس سپورتشى اشۋعا بۋلىقتى دەپ جازدى turkystan.kz.

الەكساندرا ترۋسوۆا ومىرىندەگى ەڭ باستى دودا – بەيجىڭ وليمپياداسىندا بارلىق سەكىرۋ ەلەمەنتىن قۇلاماي، ءساتتى ورىنداپ شىقتى. تورەشىلەر وعان ەركىن باعدارلاماداعى ەڭ جوعارى ۇپايدى قويدى. ءسويتىپ، ول ايەلدەر اراسىندا ءبىر باعدارلامادا 5 رەت تورتتىك سەكىرۋ ەلەمەنتىن ورىنداعان سپورتشى رەتىندە تاريحقا ەندى. دەسە دە، ەكى باعدارلاما قورىتىندىسى بويىنشا ول تاعى ءبىر رەسەيلىك سپورتشى اننا ششەرباكوۆادان 4 ۇپايعا قالىپ قويدى. سەبەبى، الەكساندرا ترۋسوۆا قىسقى باعدارلامادا 3 اينالىم اكسەلدى ورىنداۋ كەزىندە قۇلاپ قالعان بولاتىن. بۇل سپورتشىنى التىن جۇلدەدەن ايىردى.

قاتتى اشۋعا مىنگەن الەكساندرا ترۋسوۆا ماراپاتتاۋ راسىمىنە شىقپايتىنىن ايتىپ، باپكەرلەرىنە ايعايلاۋمەن بولدى. ءتىپتى، ءوزىن قۇشاقتاپ، سابىرعا شاقىرماق بولعان باپكەرى ەتەري تۋتبەريدزەنى دە يتەرىپ جىبەردى.

«ءبارىڭدى جەك كورەمىن! جەك كورەمىن! بۇل سپورتتى جەك كورەمىن! ەشقاشان مۇزعا شىقپايمىن. ەشقاشان! ءبارىنىڭ التىن مەدالى بار، مەندە جوق! جەك كورەمىن!» – دەپ بىرنەشە رەت قايتالاعان سپورتشى كوز جاسىن دا توقتاتا المادى.

ماراپاتتاۋ راسىمىنە سپورتشى مۇلدە كوڭىلسىز كۇيدە شىقتى. جەڭىمپاز اتانعان كوماندالاسى اننا ششەرباكوۆانى دا قۇتتىقتاعان جوق.

ۇقساس جاڭالىقتار

Back to top button