«مىندەتتى تۇردە اقيقاتقا كوز جەتكىزەمىن» – قاسىم-جومارت توقاەۆ

بيىلعى قاڭتاردا قازاقستاندا بولعان وقيعالارعا بايلانىستى رەسەيلىك ساراپشىلار «توڭكەرىسشىلەردىڭ ماقساتى –  پرەزيدەنت قاسىم-جومارت توقاەۆتى قازاقستاننان قۋىپ شىعۋ نەمەسە تۇتقىنعا الۋ» دەگەن بولجام جاساعان ەدى. مەملەكەت باسشىسى وسى بولجامعا قاتىستى پىكىرىن ورتاعا سالدى دەپ جازدى turkystan.kz.

– بالكىم، بۇل رەسەيدىڭ بارلاۋ قىزمەتىنىڭ كوزقاراسى شىعار. بۇل راس تا بولۋى مۇمكىن. ولار ءبىزدىڭ ەلىمىزدەگى وقيعالاردى مۇقيات باقىلاپ وتىرادى عوي. قالاي دەسەك تە، ارنايى جاساقتالعان قارۋلى باندالار بيلىكتى باسىپ العىسى كەلدى. سوندىقتان، شەتەلدىك ساراپشىلار ايتقان پىكىردىڭ جانى بار دەپ ويلايمىن، – دەدى قاسىم-جومارت توقاەۆ Qazaqstan تەلەارناسىنىڭ تىلشىسىنە بەرگەن سۇحباتىندا.

سول سەبەپتى، پرەزيدەنت بارلىعىنا بايىپپەن قاراپ، سالماقتى باعا بەرۋ قاجەت ەكەنىن ايتتى.

– «سابىر ءتۇبى – سارى التىن» دەپ حالقىمىز بەكەر ايتپاعان. بىزگە كەرەگى – اسىعىس شەشىم شىعارىپ، ءىستى جاۋىپ تاستاۋ ەمەس، مىندەتتى تۇردە اقيقاتقا كوز جەتكىزۋ. بۇل – مەنىڭ الدىما قويعان ماقساتىم، – دەدى مەملەكەت باسشىسى.

ۇقساس جاڭالىقتار

Back to top button