1000 تەڭگە ءۇشىن كىسى ولتىرگەن قىلمىسكەر 5 جىلدان كەيىن ۇستالدى (ۆيدەو)

كوكشەتاۋدا ارنايى ءىس-شارا جۇرگىزۋ بارىسىندا ادام ءولتىردى دەگەن كۇدىك بويىنشا 27 جاستاعى ەر ادام ۇستالدى، دەپ حابارلايدى turkystan.kz polisia.kz-كە سىلتەمە جاساپ.

2017 جىلدىڭ تامىزىندا كۇدىكتىنىڭ بازار ماڭايىنان Daewoo Nexia جەكەمەنشىك تاكسيىن جالداپ، «لەسوزاۆود» اۋدانىنا قاراي شىققانى انىقتالدى. دىتتەگەن جەرگە كەلگەننەن كەيىن جۇرگىزۋشى مەن جولاۋشىنىڭ اراسىندا جولاقىسىنىڭ قۇنى ءۇشىن قاقتىعىس بولعان. تاكسيست قىزمەتىنىڭ قۇنىن مىڭ تەڭگەگە باعالاعان. سوزگە كەلىسپەي قالعان جولاۋشى پىشاق الىپ شىعىپ، جۇرگىزۋشىگە 17 رەت سۇعىپ العان. سونىڭ سالدارىنان جۇرگىزۋشى وقيعا ورنىندا قايتىس بولعان. ادام ءولىمى بولعاننان كەيىن قىلمىسكەر ءىزىن جاسىرۋعا تىرىسىپ، ماشينادا قالعان ساۋساق ىزدەرىن مۇقيات سۇرتكەن. اسا اۋىر قىلمىس جاساپ، كۇدىكتى قىلمىس جاسالعان ورىننان جاسىرىنعان جانە بىرنەشە كۇننەن كەيىن كورشىلەس رەسپۋبليكاعا شىعىپ كەتكەن.

بەس جىل بويى ەلوردالىق جەدەل قىزمەتكەرلەر ادام ءولتىردى دەپ كۇدىككە ىلىنگەن ادامنىڭ جەكە باسىن انىقتاۋ بويىنشا كوپتەگەن جۇمىس جۇرگىزدى. كريميناليستەر قىلمىس ورنىنان تابىلعان بارلىق ىزدەردى زەرتتەدى. ەكى جىل وتكەننەن كەيىن اۆتوكولىكتىڭ جۇكسالعىشىنان الىنعان ساۋساق ىزدەرىن زەرتتەي وتىرىپ، كريميناليستەر سايكەستىكتى انىقتاعان. الايدا تەرگەپ-تەكسەرۋ جۇرگىزۋ بارىسىندا ساۋساق ىزدەرى قايعىلى وقيعا ورىن العانعا دەيىن ءبىراز ۋاقىت بۇرىن جۇرگىزۋشى بارعان جانار-جاعارماي قۇيۋ ستانتسياسى قىزمەتكەرىنە تيەسىلى ەكەنى انىقتالعان. وتكەن جىلدىڭ سوڭىندا كريميناليستەر ساۋساق ءىزى بويىنشا تاعى ءبىر سايكەستىكتى انىقتاعان جانە قايتادان تەكسەرىس باستاعان. ساۋساق ءىزى يەسىنىڭ 2014 جىلى بەلارۋس رەسپۋبليكاسىندا ۇرلىق جاساعانى ءۇشىن سوتتالعانى انىقتالدى. ول اقمولا وبلىسىنىڭ تۇرعىنى بولىپ شىققان. تەكسەرىس جۇرگىزۋ بارىسىندا جەدەل قىزمەتكەرلەر ونىڭ ادام ولتىرۋگە قاتىسى بار ەكەنىن انىقتاعان. ۇستالعاننان كەيىن بۇلتارتپايتىن ايعاقتاردىڭ ناتيجەسىندە كۇدىكتى جاساعان ءىسىن مويىنداعان.

قازىرگى ۋاقىتتا ول نۇر-سۇلتان قالاسى پد ۋاقىتشا ۇستاۋ يزولياتورىنا قامالدى. قازاقستان رەسپۋبليكاسى قك-ءنىڭ 99-بابى بويىنشا سوتقا دەيىنگى تەرگەپ-تەكسەرۋ جۇرگىزىلۋدە.

 

ۇقساس جاڭالىقتار

Back to top button