ساقتاندىرۋ جاعدايىن رەتتەۋدى جەڭىلدەتەتىن ەۋروحاتتاما ءتارتىبى ەنگىزىلەدى

ماماندار بۇل تەتىكتىڭ جول-كولىك وقيعاسى كەزىندەگى ساقتاندىرۋ تولەمدەرىن الۋ بارىسىن بارىنشا جەڭىلدەتەتىنىنە سەنىمدى دەپ جازدى turkystan.kz.

قازاقستان قارجى نارىعىن رەتتەۋ جانە دامىتۋ اگەنتتىگى وكىلدەرىنىڭ ايتۋىنشا، قازىر ادام زارداپ شەكپەگەن جول اپاتى بولعان جاعدايدا كولىك جۇرگىزۋشىلەرى ساقتاندىرۋ تولەمىن الۋ ءۇشىن جول پوليتسياسىن كۇتۋگە مىندەتتى. حاتتامالار راسىمدەلگەننەن كەيىن سوت شەشىمى شىعۋى كەرەك. ءسويتىپ، بۇعان 2 ايداي ۋاقىت كەتىپ قالادى. ال ساقتاندىرۋ جاعدايىن رەتتەۋدىڭ جەڭىلدەتىلگەن ءتارتىبى بويىنشا جول-كولىك وقيعاسى كەزىندە بارلىق قۇجات جىلدام رەسىمدەلەدى. ياعني، پوليتسيانىڭ حاتتاماسى مەن سوت شەشىمىن توسۋدىڭ قاجەتى جوق.

وسىعان وراي، قارجى نارىعىن رەتتەۋ جانە دامىتۋ اگەنتتىگى ارنايى زاڭ جوباسىن ازىرلەۋگە كىرىسكەن. وعان سايكەس، جول-كولىك وقيعاسى بويىنشا ساقتاندىرۋ تولەمىن جىلدام الۋ تەتىگى ەنگىزىلەدى.

بىراق تومەندەگىدەي بىرنەشە شارت بار:

  • ەكى كولىك قۇرالىنىڭ سوقتىعىسۋى;
  • جول-كولىك وقيعاسى كەزىندە كولىك قۇرالدارىنا عانا زيان كەلۋى (ادامنىڭ ءومىرى مەن دەنساۋلىعىنا زيان كەلتىرۋ جانە ءۇشىنشى تۇلعالاردىڭ مۇلكىن زاقىمداۋ بولماۋ شارت);
  • ساقتاندىرۋ ءپوليسىنىڭ بولۋى;
  • ەكى كولىك جۇرگىزۋشىسىنىڭ ءوزارا كەلىسۋى;
  • ساقتاندىرۋ تولەمى 100 اەك-تەن (306 مىڭ تەڭگەدەن) اسپاۋى.

بارلىق ءوتىنىش بىرىڭعاي ساقتاندىرۋ دەرەكقورىنىڭ موبيلدىك قوسىمشاسى ارقىلى جىبەرىلەدى.

ايتا كەتسەك، ساقتاندىرۋ جاعدايىن رەتتەۋدىڭ جەڭىلدەتىلگەن ءتارتىبى كوپتەگەن ەلدەردە كەڭىنەن تاراعان. ونى «ەۋروحاتتاما» دەپ اتايدى. بۇگىندە ەۋروحاتتاما ەۋروپادا عانا ەمەس، رەسەي، بەلارۋس، ۋكراينا، ارمەنيا مەن وزبەكستان سياقتى تمد-نىڭ بىرقاتار مەملەكەتتەرىندە بار.

ۇقساس جاڭالىقتار

Back to top button