جاپپاي تارتىپسىزدىككە قاتىسى بار قىلمىستىق توپتىڭ باسشىلارى ۇستالدى (ۆيدەو)

قاڭتار ايىندا بولعان جاپپاي تارتىپسىزدىكتەردى ۇيىمداستىرۋعا قاتىسى بار بىرقاتار قىلمىستىق توپتىڭ باسشىلارى مەن قاتىسۋشىلارى ۇستالدى دەپ جازدى turkystan.kz Polisia.kz-كە سىلتەمە جاساپ.

بىرنەشە وڭىردە بولعان ب ۇلىكتەن كەيىن ءىىم كريمينالدىق پوليتسيا دەپارتامەنتى نۇر-سۇلتان، الماتى، اقتوبە، وسكەمەن جانە قىزىلوردا قالالارىندا جۇرگىزىلگەن جەدەل-ىزدەستىرۋ ءىس-شارالارى بارىسىندا بىرقاتار قىلمىستىق توپتاردىڭ باسشىلارى مەن ۇيىمداسقان قىلمىستىق توپتاردىڭ قاتىسۋشىلارىن ۇستادى جانە جاۋاپكەرشىلىككە تارتتى. ولاردىڭ 4-7 قاڭتاردا جاپپاي تارتىپسىزدىكتەردى ۇيىمداستىرۋعا قاتىسى بار-جوعى تەكسەرىلىپ جاتىر.

جۇرگىزىلگەن ارنايى وپەراتسيالاردىڭ ناتيجەلەرى بويىنشا ۇستالعانداردان كوپتەگەن قارۋ-جاراق تۇرلەرى الىندى. اتاپ ايتقاندا،  2 «كالاشنيكوۆ» اۆتوماتى، 4 «پم» تاپانشاسى، 4 «گلوك» تاپانشاسى، رەۆولۆەر، «تت» تاپانشاسى، پومپالىق مىلتىق، اۆتوماتتى مىلتىق، «سايگا-410» تەگىس ۇڭعىلى كارابينى، «وسا» تراۆماتيكالىق تاپانشاسى، «رگد-5» گراناتى جانە ءارتۇرلى كاليبرلى 130-دان استام وق-دارىلەر تابىلعان.

بارلىق ۇستالعاندارعا قاتىستى «كۇزەتپەن ۇستاۋ» بۇلتارتپاۋ شاراسى تاڭدالىپ، سوتقا دەيىنگى تەرگەۋ امالدارى جۇرگىزىلىپ جاتىر.

ۇقساس جاڭالىقتار

Back to top button