Жаппай тәртіпсіздікке қатысы бар қылмыстық топтың басшылары ұсталды (ВИДЕО)

Қаңтар айында болған жаппай тәртіпсіздіктерді ұйымдастыруға қатысы бар бірқатар қылмыстық топтың басшылары мен қатысушылары ұсталды деп жазды turkystan.kz Polisia.kz-ке сілтеме жасап. Бірнеше өңірде болған бүліктен кейін ІІМ Криминалдық полиция департаменті Нұр-Сұлтан, Алматы, Ақтөбе, Өскемен және Қызылорда қалаларында жүргізілген жедел-іздестіру іс-шаралары барысында бірқатар қылмыстық топтардың басшылары мен ұйымдасқан қылмыстық топтардың қатысушыларын ұстады және жауапкершілікке тартты. Олардың 4-7 қаңтарда жаппай тәртіпсіздіктерді ұйымдастыруға қатысы бар-жоғы тексеріліп жатыр. Жүргізілген арнайы операциялардың нәтижелері бойынша ұсталғандардан көптеген қару-жарақ түрлері алынды. Атап айтқанда,  2 «Калашников» автоматы, 4 «ПМ» тапаншасы, 4 «Глок» тапаншасы, револьвер, «ТТ» тапаншасы, помпалық мылтық, автоматты мылтық, «Сайга-410» тегіс ұңғылы карабині, «Оса» травматикалық тапаншасы, «РГД-5» гранаты және әртүрлі калибрлі 130-дан астам оқ-дәрілер табылған. Барлық ұсталғандарға қатысты «күзетпен ұстау» бұлтартпау шарасы таңдалып, сотқа дейінгі тергеу амалдары жүргізіліп жатыр.