رەسەيلىك مانەرلەپ سىرعاناۋشىلار دوپينگ داۋىنا بايلانىستى التىن مەدالسىز قالۋى مۇمكىن

قىسقى وليمپيادادا مانەرلەپ سىرعاناۋدان كوماندالىق تۋرنيردە رەسەيلىك سپورتشىلار جەڭىسكە جەتكەن بولاتىن. الايدا، جەڭىمپازداردى ماراپاتتاۋ ءراسىمى كەيىنگە شەگەرىلدى. ەندى ونىڭ سەبەبى بەلگىلى بولدى. ول – دوپينگ، دەپ جازدى turkystan.kz Inside the Games-كە سىلتەمە جاساپ.

بەيجىڭدەگى سايىس رەسەيلىك كونكيشىلەر ءۇشىن ءساتتى باستالعان ەدى. الايدا، كورشى ەل بۇل التىن مەدالدەن ايىرىلۋى مۇمكىن. بەلگىلى بولعانداي، سپورتشىلاردىڭ ءبىرىنىڭ دوپينگ سىناماسى وڭ ناتيجە كورسەتكەن.

حالىقارالىق وليمپيادا كوميتەتىنىڭ وكىلى مارك ادامستىڭ ايتۋىنشا، ماراپاتتاۋ ءراسىمى حالىقارالىق فەدەراتسيادان زاڭگەرلىك كەڭەس الۋ قاجەتتىلىگىنە بايلانىستى كەيىنگە قالدىرىلعان.

«بۇل ىسكە مەدال جەڭىپ العان سپورتشىلار قاتىسادى. ءبىز ماسەلەنى تەزىرەك شەشۋ ءۇشىن قولدان كەلگەننىڭ ءبارىن جاساۋدامىز. مەن بۇل وقيعا تۋرالى اقپارات بەرە المايمىن. بۇگىن ءبىز جاڭارتىلعان اقپاراتپەن بولىسۋگە تىرىسامىز»، – دەدى مارك ادامس.

ايتا كەتسەك، ماراپاتتاۋ ءراسىمى 7 اقپاندا ءوتۋى ءتيىس بولعان. بىراق ول 8 اقپانعا اۋىستىرىلدى. ءىس-شاراعا بىرەر ساعات قالعاندا ول تاعى كەيىنگە شەگەرىلدى. حوك بۇل جاعداي حالىقارالىق كونكيمەن جۇگىرۋشىلەر وداعىمەن زاڭگەرلىك كەڭەس الۋ قاجەتتىلىگىمەن بايلانىستى ەكەنىن ايتتى.

ۇقساس جاڭالىقتار

Back to top button