Үкіметтің кеңейтілген отырысында Президент Қасым-Жомарт Тоқаев Қазақстанда майнингке салынатын салықты арттыруды және тексеруді тапсырды, деп жазды turkystan.kz.
«Криптовалюта өндірісінің әлеуметтік-экономикалық әсері аз. Жаппай жұмыс орындары құрылмайды, нақты өнім жоқ. Сонымен қатар, бұл сала электр энергиясын бірнеше облыс сияқты пайдаланады. Кейбір жосықсыз криптовалюта өндірушілер халыққа берілетін тарифтерден төмен тарифтерді пайдаланады. Импорттық жабдыққа салықтар мен баж салығы төленбейді. Ең бастысы, бұрынғы ресурстарды сарқып, ақша тауып жатыр», - деді Қасым-Жомарт Тоқаев.
Мемлекет басшысы Қаржы мониторингі агенттігіне жағдайды жан-жақты қарауды тапсырды.
«Барлық криптовалюта өндірушісін анықтап, салық және кеден мәселелерін тексеріп, техникалық келісімшарттарды, сондай-ақ қызметтің басқа да аспектілерін мұқият зерделеу қажет. 19 наурызға дейін есеп беруді тапсырамын», - деді Мемлекет басшысы.
Бұл ретте Қасым-Жомарт Тоқаев мемлекет заңды майнингке қарсы емес екенін баса айтты. Бірақ бұл салада жұмыс істегісі келетіндердің тиісті лицензиясы болуы, сәйкес тариф бойынша электр қуатын алуы, кірістерін декларациялауы және салық төлеуі, жасыл энергетика жобаларын іске қосуы керек.
Сондай-ақ ол криптовалюта өндіру салығы өсетінін мәлімдеді.
«Қазіргі мөлшерлеме – электр қуатының бір киловатына 1 теңге мардымсыз. Үкіметке бұл салықты тез арада еселеп көтеруді пысықтауды тапсырамын. Цифрлық майнинг жұмысын реттеу және дамыту бойынша толыққанды шешімдер пакетін әзірлеу керек. Нәтижесін 1 сәуірге дейін күтемін», - деп түйіндеді сөзін Мемлекет басшысы.
БАҚ мәліметінше, Қазақстан криптовалюта өндіруден әлемде АҚШ-тан кейінгі 2-орында тұр.
Айта кетсек, елімізде 1 қаңтардан бастап цифрлық майнингке салық енгізілген болатын.
