ءبىر حاكەر سولتۇستىك كورەيانى ينتەرنەتسىز قالدىردى

اقش-تىڭ كيبەرقىلمىسكەرى بۇل قادامعا پحەنيان وعان قارسى جۇرگىزگەن كيبەرشابۋىل ءۇشىن كەك الۋ ماقساتىندا بارعان، دەپ جازدى turkystan.kz Daily Mail-گە سىلتەمە جاساي وتىرىپ.

باسىلىمنىڭ مالىمەتىنشە، عالامتوردا P4x لاقاپ اتىمەن تانىمال حاكەر كحدر-عا بىرنەشە DoS شابۋىل جاساعان. سالدارىنان كوپشىلىككە قولجەتىمدى بىرنەشە مەملەكەتتىك سايت ىستەن شىعىپ، ەلەكتروندىق پوشتا ترافيگىنىڭ جىلدامدىعى تومەندەگەن.

ادەتتە، DoS شابۋىلدار جۇيەنى جالعان ترافيكپەن تولتىرىپ، سەرۆەرلەردىڭ وڭدەۋ قۋاتىن شەكتەيدى. وسىلايشا، ەلەكتروندىق جۇيەنىڭ ءالسىز تۇستارىن ۇتىمدى پايدالانا بىلگەن حاكەر ەلدىڭ بارلىق ۆەب-سايتتارىن 6 ساعاتقا ىستەن شىعارعان.

«مەن كحدر-دان حاكەرلىك قۇرالدارىمدى ۇرلاۋعا باعىتتالعان كيبەرشابۋىلداردىڭ قۇربانىمىن. سول سەبەپتى، سولتۇستىك كورەياعا وسى كيبەرشابۋىلداردى جاسادىم. اقش بيلىگى، فبر ماعان جاسالعان كيبەرشابۋىلدارعا ەشقانداي شارا قولدانعان جوق. سوندىقتان ماسەلەنى ءوز قولىما الۋعا تۋرا كەلدى»، – دەيدى حاكەر.

ءبىر قىزىعى، سولتۇستىك كورەيا تۇرعىندارىنىڭ باسىم بولىگى ماڭىزدى سايتتارعا DoS شابۋىلداردىڭ جاسالعانىن بايقاعان دا جوق. سەبەبى، بۇل ەلدە بار حالىقتىڭ تەك 1 پايىزى عانا ينتەرنەتتىڭ يگىلىگىن كورۋدە.

ۇقساس جاڭالىقتار

Back to top button