Жақында Өзбекстан Жазушылар одағының жанындағы Қазақ әдебиеті шығармашылық кеңесінің есеп беру жиналысы өтіп, онда ұйымдастыру мәселелері қаралды. Нәтижесінде, бұрын Өзбекстан Жазушылар одағының жанында секция ретінде жұмыс жүргізіп келген қазақ қаламгерлерінің ұйымы Өзбекстан Жазушылар одағындағы Қазақ әдебиеті кеңесіне айналып, оның төрағасы болып жас қаламгер Тұрсынәлі Ахметов тағайындалды. Іс-шараға Өзбекстан Жазушылар одағы төрағасының орынбасары Ғайрат Мажид қатысты. Жиналыста өткен жылы қазақ әдебиеті секциясының атқарған істері жайында айтылды. 2021 жылы өзбек еліндегі қазақ қаламгерлерінің мұрындық болуымен қазақ әдебиетінің классигі Абай Құнанбайұлының 175 жылдығы үлкен деңгейде атап өтілсе, биыл туғанына 580 жыл толғалы отырған өзбектің ұлы ақыны Әлішер Науаидың меретойын өткізуге дайындық жұмыстары жүргізілген. Өткен жыл өзбек еліндегі қаламгерлердің қатысуымен бірқатар әдеби шығарма, көркем аударма туынды, әдеби-зерттеу еңбегі баспадан шықты. Осы жөнінде Низами атындағы Ташкент мемлекеттік педагогикалық институтының қазақ тілі мен әдебиеті кафедрасының меңгерушісі, педагогика ғылымдарының докторы, профессор Ергеш Абдувалитов баяндама жасап, Өзбекстандағы бүгінгі қазақ әдебиетінің дамуы жолында тер төгіп келе жатқан Қалдыбек Сейданов, Мекембай Омаров, Сапарбек Иманбеков, Абдолла Рүстемов, Қошқарбай Байжігітов, Серік Асылбеков, Наурызбай Жарбосынұлы, Тұрсынәлі Ахметовтердің жемісті шығармашылығы жайында айтып өтті. Ал өткен жылы өзбек елінде Серік Асылбековтің «Айдаркөл әуендері», Қошқарбай Байжігітовтің «Көңілде жүрген күншуақ» жыр жинағы, ғалым Қалдыбек Сейдановтың «Абай және Орта Азия әдебиеті» монографиясы жарық көрсе, Қозоқбой Йулдошевтың аударуымен өзбек тілінде «Абайдың қара сөздері», Тұрсынәлі Ахметовтің тәржімелеуімен қазақ тілінде Садриддин Айнидің «Өсімқордың өлімі» повесі басылып шыққан. Сондай-ақ қазақ тілінде өзбектің әйгілі ақындары Еркін Вахидов пен Абдулла Ариповтың шығармаларынан құрастырылған «Ұлылар тағылымы» атты кітап оқымандармен қауышты. Қос ақынның кітапқа кірген туындыларын қазақшалаған ақындар – Мекембай Омаров пен Боран Қыдыров. Тұрсынәлі АХМЕТОВ, Өзбекстан Жазушылар одағы жанындағы Қазақ әдебиеті кеңесінің төрағасы: 2022 жылдан бастап Қазақ әдебиеті секциясының мәртебесі артады Қазақ әдебиеті кеңесінің өткен жылы атқарылатын істердің жоспары талқыланған жиында Өзбекстан Жазушылар одағының мүшелері Қалдыбек Сейданов, Рустам Мусурмон, Ташкент қаласы қазақ ұлттық мәдени орталығының төрағасы Тұрсымат Қалбаев, ақын әрі ардагер журналист Құлназар Ибрагимов, ақын Лала Жұмановалар Қазақ әдебиеті кеңесінің жұмысын одан әрі жандандыру, жастарды шығармашылыққа кеңінен жұмылдыру, ақын-жазушылар мен кітапқұмар оқырмандардың кездесулерін тұрақты ұйымдастыру жөнінде ойға алған пікірлерін білдірді. Айтылған ұсыныстар бойынша маңызды міндеттер белгіленіп, олардың орындалуы бойынша Кеңес мүшелеріне тапсырмалар берілді. Биылға дейін Өзбекстан Жазушылар одағындағы Ұлтаралық әдебиет кеңесінің құрамында қазақ әдебиеті секциясы ғана бар еді. Осы Қазақ әдебиеті секциясы айтарлықтай жұмыстар атқарып келді. Соңғы 2021 жылдың өзін алсақ, пандемия жағдайына қарамай жемісті еңбек етіп, онлайн форматта болса да тұрақты түрде жиналыстар өткізіліп, еліміздегі қазақ қаламгерлерінің қолжазбаларын талқылап, оларды барынша қолдап-қуаттап отырды. Өткен жылы түрлі жанрда 20-ға жуық қазақ тілінде немесе қазақ тілінен өзбек тіліне аударма жасалған әдеби кітаптардың баспадан шыққаны, сондай-ақ 5 қазақ қаламгерінің Өзбекстан Жазушылар одағына мүше болғаны – соның айғағы. Ал 2022 жылдан бастап Қазақ әдебиеті секциясының мәртебесі артып, Өзбекстан Жазушылар одағындағы Қазақ әдебиеті кеңесі ретінде өз жұмысын бастады. Қазақ әдебиеті кеңесінің алғашқы жиналысында кеңестің құрамы бекітіліп, алда атқарылатын міндеттер белгілеп алынды. Дарынды қаламгерлерге нақты әлеуметтік тапсырыстар беру, олардың шығармаларын баспаға ұсыну арқылы қазақ тілінде сапалы әдеби туындылардың жаратылуына жағдай жасау, қазақ жастарының шығармашылыққа, көркем әдебиетке деген қызығушылығын арттыру, Өзбекстандағы қазақ әдебиетін насихаттау, өзбек әдебиетінің таңдаулы шығармаларын қазақ тіліне аударма жасау сияқты бағыттарда белсене жұмыс жүргізудің қажеттілігі айтылды.
А. ЖҰМАҒАЛИҰЛЫ