ۇلىن ميلليون تەڭگەگە ساتىپ جىبەرگەن اناعا قاتىستى سوت ۇكىمى شىقتى

ءاۋ باستا شىمكەنت قالاسىنىڭ تۇرعىنى ءوز بالاسىن 1،5 ميلليون تەڭگەگە باعالاعان. بىراق ارتىنان ميلليونعا ساتۋعا كەلىسەدى. كوپبالالى انا بۇل ارەكەتى ءۇشىن 7 جىلعا سوتتالدى، دەپ جازدى turkystan.kz Otyrar پورتالىنا سىلتەمە جاساپ.

ايىپتالۋشى – ءتورت بالانىڭ اناسى. كۇيەۋىمەن اجىراسقاننان كەيىن ءسۇت كەنجەسىن پەرزەنتحانادا قالدىرىپ كەتكىسى كەلگەن. بىراق دارىگەرلەر بالانى ۇيگە الىپ كەتۋگە كوندىرگەن. ءبىر جارىم جىلدان كەيىن قارجى جاعىنان قينالعان ول كىشكەنتاي ۇلىن ساتىپ جىبەرۋگە بەل بۋادى. ايەل الدىمەن ءوز ويىن تانىستارىنا ايتقان. اقىر سوڭىندا بۇل اقپارات پوليتسيا قىزمەتكەرلەرىنە جەتەدى. ءتارتىپ ساقشىلارى بالاسى جوق ەرلى-زايىپتىنىڭ ءرولىن ويناپ، ايەلدى قىلمىس ۇستىندە ۇستايدى.

«ول الدىمەن بولاشاق «ساتىپ الۋشىلاردى» بالانى كورسەتۋ ءۇشىن ۇيىنە شاقىرعان. باسىندا 1،5 ميلليون تەڭگە سۇراپتى. بىراق ارتىنان سومانى تومەندەتۋگە كەلىسكەن. اقشانى العان ازاماتشا بالانى كيىندىرىپ بەرگەن كەزدە ۇستالدى. پوليتسەيلەر ءبارىن جاسىرىن كامەراعا جازىپ العان»، – دەيدى يۋۆەنالدى سوت توراعاسى داۋرەن سايحانوۆ.

سوت شەشىمىمەن بالاسىن ساتقان ايەل 7 جىلعا باس بوستاندىعىنان ايىرىلدى. ال بالالار اكەسىنە تاپسىرىلدى.

ۇقساس جاڭالىقتار

Back to top button